სტატიის სახელმა თუ დეჟავუს გრძნობა დაგიტოვა, მარტო არ ხარ — ჩვენც ასე ვიყავით, როცა აღმოვაჩინეთ, რომ მსგავსი სათაურით ამბავი ადრეც გამცნეთ და ეს სწორედ ოთხი წლის წინ იყო...

ჰო, როგორც ჩანს, Lorde თავის ალბომებს შორის მკაცრად იცავს დროის ოლიმპიურ შუალედს — ოთხ წელიწადს. ახალზელანდიელმა მუსიკოსმა სულ ახლახან თავისი მორიგი სინგლი დააანონსა. სიმღერა, სახელწოდებით What Was That "მალე" გამოვა. მუსიკოსმა ინსტაგრამზე სინგლის გარეკანის ფოტოც გამოაქვეყნა.

ახალი სიმღერის გამოსვლაზე Lorde-მა რამდენიმე დღის წინაც მიგვანიშნა ტიკტოკზე გამოქვეყნებული ვიდეოთი. 15-წამიან ვიდეოში, რომელსაც ამ დროისთვის უკვე 3,8 მილიონზე მეტი მოწონება და 32 მილიონზე მეტი ნახვა აქვს, მომავალი სინგლის ნაწყვეტი ჟღერს.

@lorde

♬ WWT - Lorde

Lorde, რომლის ნამდვილი სახელი ელა მარია ლენი იელიჩ-ო'კონორია, თანამედროვეობის ერთ-ერთ ყველაზე წარმატებული პოპვარსკვლავია. მის სახელზეა გრემის ორი ჯილდო და ოქროს გლობუსის ნომინანტობა. მუსიკოსს საყოველთაო აღიარება 16 წლის ასაკში გამოშვებულმა სადებიუტო ალბომმა Pure Heroine (2013) მოუტანა. კიდევ უფრო დიდი წარმატება ხვდა წილად მის მეორე ალბომს Melodrama (2017). Lorde-ის ამ დროისთვის ბოლო ნამუშევარი კი 2021 წელს გამოშვებული ალბომი Solar Power გახლავთ.

ახალზელანდიელი მომღერალი ჟურნალმა Time-მა 2013 და 2014 წლებში მსოფლიოს ყველაზე გავლენიან მოზარდებს შორისაც დაასახელა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...