რა ხდება: პრაღაში, კარლის უნივერსიტეტში მომხდარი თავდასხმის გამო, ჩეხეთში შაბათი გლოვის დღედ გამოცხადდა.

ქვეყნის პრემიერ-მინისტრის თქმით, დაშვებული იქნება ყველა დროშა, შუადღისას კი ჩეხეთი, წუთიერი დუმილით, პატივს მიაგებს გარდაცვლილებს.

• თავდასხმას 14 ადამიანი ემსხვერპლა, 25 კი დაიჭრა.
• დაშავებულებიდან 10-ის მდგომარეობა მძიმეა.
• დაღუპულებს შორის არის თავად თავდამსხმელიც.

///

რა არის ცნობილი თავდამსხმელის შესახებ: მის ვინაობას ოფიციალური პირები არ ასახელებენ.

ცნობილია, რომ ის 24 წლის იყო და იმავე უნივერსიტეტში სწავლობდა, სადაც ცეცხლი გახსნა.

• პოლიციის თქმით, კაცი, ასევე, ეჭვმიტანილია საკუთარი მამის მკვლელობაში.
• მათივე თქმით, აქვთ ეჭვი, რომ თავდამსხმელმა მოკლა ახალგაზრდა კაცი და მისი 2 თვის ბავშვიც. გარდაცვლილები პრაღის გარეუბანში 15 დეკემბერს იპოვეს.
• პოლიციის ინფორმაციით, ახალგაზრდა კაცი ნასამართლევი არ ყოფილა, თუმცა ჩხრეკის შედეგად, აღმოაჩინეს იარაღისა და ტყვიების დიდი მარაგი.

თავდასხმის მოტივი ამ დრომდე უცნობია, თუმცა, პოლიციის თქმით, აქვთ დაუდასტურებელი ინფორმაცია მისი სოციალური მედიის ანგარიშიდან, რომ თავდასხმის ინსპირაცია იყო რუსეთში მომხდარი მსგავსი თავდასხმა, თუმცა სხვა დეტალებზე სამართალდამცველებს არ უსაუბრიათ.

ამავე თემაზე: განცხადება პრაღაში მყოფ საქართველოს მოქალაქეთა საყურადღებოდ

რა მოხდა გუშინ კარლის უნივერსიტეტში: სროლა, ხელოვნების ფაკულტეტის შენობაში, რომელიც პრაღის ცენტრში მდებარეობს, ადგილობრივი დროით, დაახლოებით, 15 საათზე დაიწყო.

• სროლამდე ცოტა ხნით ადრე, პოლიციაში შევიდა შეტყობინება, რომ ეჭვმიტანილი, დედაქალაქთან ახლოს მდებარე პატარა ქალაქიდან პრაღაში მიდიოდა განზრახვით, რომ თავი მოეკლა.
• ცოტა ხნის შემდეგ, კაცის მამა გარდაცვლილი იპოვეს.
• პოლიციამ მოახდინა უნივერსიტეტის იმ შენობიდან ხალხის ევაკუაცია, სადაც კაცი ლექციაზე დასწრებას გეგმავდა, თუმცა ცოტა ხანში, ისინი უნივერსიტეტის ახლომდებარე, მთავარ შენობაში გამოიძახეს.

შეიარაღებულმა პირმა ცეცხლი გახსნა შენობის კორიდორებსა და აუდიტორიებში.
სტუდენტებმა და ლექტორებმა, ავეჯით გადაკეტეს ოთახების ნაწილის შესასვლელები.

მასობრივი სროლების ისტორია ევროპაში

პრაღაში მომხდარი თავდასხმა ევროპაში საუკუნის ერთ-ერთი ყველაზე ფატალური აღმოჩნდა.

2011 წლის ივლისში, ნორვეგიაში, ანდერს ბრეივიკმა მოკლა 77 ადამიანი, მათი უმეტესობა მოზარდები იყვნენ, ისინი კუნძულზე საზაფხულო ბანაკში იმყოფებოდნენ.

2002 წლის აპრილში, გერმანიაში, 19 წლის რობერტ შტეინჰაუზერმა მოკლა 16 ადამიანი — 13 მასწავლებელი, 2 მოსწავლე და პოლიციელი. ის წინა წელს სკოლიდან გარიცხეს.

2009 წლის მარტს, გერმანიაში, 17 წლის ტიმ კრეჩმერმა 15 ადამიანი მოკლა მის ყოფილ სკოლაში, პატარა ქალაქში შტუტგარტთან ახლოს.

2001 წელს შვეიცარიაში, ფრიდრიხ ლეიბახერი შევიდა რეგიონულ პარლამენტში, პოლიციის უნიფორმით. მოკლა 14 ადამიანი და დაჭრა 10.

2013 წლის აპრილში სერბეთში, ბელგრადთან ახლოს მდებარე სოფელში, ლუბისა ბოგდანოვიჩმა მოკლა 13 ადამიანი, მათ შორის, 2 წლის ბავშვი, დაჭრა საკუთარი ცოლი. ბოგდანოვიჩი სამხედრო ვეტერანი იყო, რომელიც სერბეთის ძალებთან ერთად, ხორვატიის ომში იბრძოდა, 1990-იან წლებში.