მოკლედ: პოლიტიკოს ინფორმაციით, ევროკავშირის სამიტზე, უკრაინის შესახებ, დაახლოებით, 3-საათიანი მსჯელობის შემდეგ, გერმანიის კანცლერმა ოლაფ შოლცმა შესთავაზა უნგრეთის პრემიერ-მინისტრს, ვიქტორ ორბანს, კენჭისყრის დროს ოთახი დაეტოვებინა.

  • შოლცმა მას უთხრა, რომ თუ ნამდვილად არ სურდა კიევთან გაწევრიანების მოლაპარაკებების დაწყება, ოთახი მცირე ხნით უნდა დაეტოვებინა.
  • გერმანიის კანცლერმა ამ წინადადებით უნგრეთის პრემიერ-მინისტრს ევროპელი კოლეგების თანდასწრებით, მოლაპარაკებების მაგიდასთან მიმართა.

მალე, ორბანმა დატოვა ოთახი, რამაც საშუალება მისცა ევროკავშირს, მიეღო ისტორიული გადაწყვეტილება, უკრაინასთან წევრობის მოლაპარაკებების შესახებ.

///

კონტექსტი: ვიქტორ ორბანი, რომელსაც ახლო ურთიერთობა აქვს რუსეთის პრეზიდენტთან, არ იყო თანახმა, დაწყებულიყო უკრაინასთან გაწევრიანების მოლაპარაკებები.

  • მან გუშინ, სამიტის დაწყებამდე თქვა, რომ უკრაინას არ შეუსრულებია პირობები, ამიტომ ვერ ხედავდა მიზეზს, რატომ უნდა დაწყებულიყო მასთან გაწევრიანების მოლაპარაკებები.
  • დღის ბოლოს კი ცნობილი გახდა, რომ ორბანმა არ გამოიყენა ვეტო და უბრალოდ, კენჭისყრაში მონაწილეობა არ მიიღო.

რას შეცვლიდა ორბანის ვეტო: გადაწყვეტილებისთვის საჭირო იყო ევროკავშირის ქვეყნების ლიდერების ერთსულოვანი თანხმობა.

  • იმ შემთხვევაში, თუ ერთი წევრი მაინც გამოიყენებდა ვეტოს, უკრაინასთან ეს პროცესი არ დაიწყებოდა.
  • შოლცის თქმით, თუ უნგრეთის პრემიერ-მინისტრი კენჭისყრაში მონაწილეობას არ მიიღებდა, ევროკავშირის წესების თანახმად, დანარჩენი 26 ლიდერი მაინც შეძლებდა გადაწყვეტილების მიღებას.

ბოლო ხაზი: ხანგრძლივი მოლაპარაკებების შემდეგ, გუშინ, დღის ბოლოს, ევროპის საბჭოს პრეზიდენტმა შარლ მიშელმა X-ზე დაწერა, რომ საქართველოს მიანიჭეს კანდიდატის სტატუსი, უკრაინასთან და მოლდოვასთან კი გაწევრიანებაზე მოლაპარაკებები დაიწყება.

მსგავსი თემა: რას ნიშნავს მოლაპარაკებების ეტაპი, რომელიც ქვეყნისთვის კანდიდატის სტატუსის მინიჭებას მოჰყვება