რა ხდება: უნგრეთის პრემიერ-მინისტრი, ვიქტორ ორბანი წინააღმდეგია, უკრაინასთან ევროკავშირში გაწევრიანების მოლაპარაკებები დაიწყოს.

  • ის ამბობს, რომ უკრაინას ამისთვის პირობები არ შეუსრულებია.

რას ნიშნავს ეს უკრაინისთვის: კანდიდატ ქვეყანასთან გაწევრიანების მოლაპარაკების დასაწყებად, აუცილებელია ევროკავშირის ყველა ქვეყნის მთავრობის ერთსულოვნება.

  • თუ ევროკავშირის რომელიმე ქვეყანა გაფართოების პოლიტიკის წინააღმდეგია, ამან შეიძლება კანდიდატი ქვეყნისთვის პროცესი გაართულოს, ან — გადაწყვეტილების მიღება დროებით შეაჩეროს.
  • შესაბამისად, უკრაინისთვის მნიშვნელოვანია, მოლაპარაკებების დაწყებაზე თანახმა იყოს ევროკავშირის 27-ვე ქვეყნის ლიდერი.

რას ამბობს ზელენსკი: უკრაინის პრეზიდენტი მიიჩნევს, რომ თუ ევროკავშირი ვერ შეთანხმდება უკრაინასთან მოლაპარაკებების დაწყების შესახებ, ეს ვლადიმირ პუტინის გამარჯვება იქნება.

  • "დღეს გადაწყვეტილებას მიიღებს ან ბრიუსელი, ან მოსკოვი", — თქვა ზელენსკიმ, რომელმაც ევროკავშირის სამიტზე, ქვეყნების ლიდერებს დისტანციურად, ვიდეოჩართვის საშუალებით მიმართა.

ბოლო ხაზი: ბრიუსელში ევროკავშირის ორდღიანი სამიტი დღეს დაიწყო, სადაც ევროკავშირის გაფართოების საკითხსაც განიხილავენ.

  • საქართველო ევროკავშირის ლიდერებისგან კანდიდატი ქვეყნის სტატუსის მიღებას ელოდება.