BBC-ის ტელეწამყვანმა, მერიემ მოშირიმ, შემთხვევით გადაცემაში შუა თითი აჩვენა. პროგრამის დაწყებამდე ის მეგობრებთან ერთად ხუმრობდა, თუმცა კადრი ეთერში მოხვდა. მერიემმა გადაცემა ახალი ამბების შეტყობინებით დაიწყო, მოგვიანებით კი, სოციალურ ქსელში მაყურებლებს ბოდიში მოუხადა.

"გუშინ, ეთერის დაწყებამდე, მეგობრებთან ერთად ვხუმრობდი. როდესაც უკუთვლა დაიწყო, 10-დან 1-მდე თითოეულ ციფრს ხელით ვუჩვენებდი და ერთიანზე შუა თითი ხუმრობით ავწიე. არ ვიცოდი, რომ ეს კადრი ეთერში მოხვდებოდა. ბოდიშს ვიხდი, თუ ვინმე ამით გავანაწყენე. სულელური, მეგობრებზე გათვლილი ხუმრობა იყო", — წერს ჟურნალისტი.

საზოგადოების ნაწილისგან მოშირიმ კრიტიკა დაიმსახურა და მის ქცევას არაპროფესიონალური უწოდეს, თუმცა მას გულშემატკივრებიც გამოუჩნდნენ, რომელთაც შეაქეს კიდეც. მათი თქმით, საბოდიშო არაფერი ჰქონდა და მოითხოვეს, რომ მსგავსი ხუმრობები ხშირად გაემეორებინა.

ჟურნალისტი BBC-ში წარსულში დაშვებულ შეცდომებთან შედარებით სიტუაციიდან მარტივად გამოძვრა — მსგავსი შემთხვევა 2010 წელს სხვა ჟურნალისტსაც ჰქონდა, რომელმაც ერთ-ერთ ტელეწამყვანს ხუმრობით შუა თითი აუწია. მოგვიანებით მან პოზის შეცვლა წარუმატებლად სცადა, რის გამოც საზოგადოებამ მასხრად აიგდო.

ტელევიზიის მაყურებლებს 2006 წელს დაშვებული შეცდომაც ახსოვთ, როდესაც BBC-ში გასაუბრებაზე IT სპეციალისტი მივიდა, თუმცა ის ეთერში მიწვეულ სტუმარში აერიათ და გასაუბრებაზე მისული გადაცემაში აღმოჩნდა.