რა ხდება: ზავის ამოწურვიდან მალევე, ისრაელის სამხედრო თვითმფრინავებმა ღაზის დაბომბვა გააგრძელეს. ისრაელის თავდაცვის ძალების განცხადებით, ომი სრული ინტენსივობით გაგრძელდა.

დეტალები: დაიბომბა ღაზის სამხრეთი, აფეთქებებია ჩრდილოეთითაც, ქალაქ ღაზის სიახლოვეს.

• საჰაერო განგაშის სიგნალი ისმოდა ისრაელშიც, ღაზის საზღვართან ახლოს. სავარაუდოდ, დარტყმები განაახლა ჰამასმაც.
• ისრაელის თავდაცვის ძალების განცხადება, ავიადარტყმების განახლების შესახებ, ზავის ამოწურვიდან 30 წუთის შემდეგ გავრცელდა.

რა მოხდა ზავის ფარგლებში: ცეცხლის შეწყვეტის შესახებ შეთანხმება 24 ნოემბერს შევიდა ძალაში. თავდაპირველად, ზავის ხანგრძლივობა 4 დღით განისაზღვრა, თუმცა, კატარისა და ეგვიპტის შუამავლობით, მოლაპარაკებების შედეგად, კიდევ რამდენიმე დღით გახანგრძლივდა.

• ერთკვირიანი ზავის დროს, ჰამასმა და სხვა დაჯგუფებებმა ღაზაში გაათავისუფლეს 100-ზე მეტი მძევალი, მათი უმეტესობა ისრაელელია. ისრაელის ციხეებიდან კი, სანაცვლოდ, 240 პალესტინელი პატიმარი გამოუშვეს.
• ყველა გათავისუფლებული პირი ქალი და ბავშვია, მაგრამ იმის გამო, რომ მძევლებს შორის კვლავ რჩებიან არასრულწლოვანები და ქალები, ზავის შემდგომი გაგრძელების თაობაზე მოლაპარაკება გართულდა.
• ზავის დროს გათავისუფლდა 83 ისრაელელი, მათ შორის არიან ორმაგი მოქალაქეობის მქონე პირები. 24 ტყვე — 23 ტაილანდელი და ერთი ფილიპინელი ასევე თავისუფლები არიან, მათგან რამდენიმე კაცია.
• ამ დრომდე ვერ აზუსტებენ, დარჩენილ ტყვეებს შორის რამდენი არის სამხედრო ქალი.
• ცეცხლის შეწყვეტამდე ჰამასმა გაათავისუფლა ოთხი მძევალი, ისრაელის არმიამ თავად შეძლო ერთის დახსნა.
• ღაზაში ორი ტყვე გარდაცვლილი იპოვეს.
• ზავის ფარგლებში, ისრაელის ციხეებიდან გათავისუფლებული 240 პალესტინელი პატიმარი, ძირითადად, მოზარდები არიან, რომლებსაც ბრალი ედებოდათ ისრაელელ ჯარისკაცებთან დაპირისპირებისას ქვების და ასაფეთქებელი საშუალებების გამოყენებაში. ასევე, გათავისუფლებულებს შორის არიან ისრაელელ სამართალდამცველებთან დაპირისპირების გამო დაკავებული ქალებიც.

ზეწოლა ისრაელზე: ბოლო პერიოდის განმავლობაში, ისრაელზე ზეწოლა იზრდება, მათ შორის, მისი მოკავშირე აშშ-სგან. ქვეყნები მოითხოვენ, რომ პალესტინელი მშვიდობიანი მოსახლეობის დასაცავად უფრო მეტი გაკეთდეს.

• აშშ-ის სახელმწიფო მდივანი, ენტონი ბლინკენი გუშინ ისრაელის პრემიერ-მინისტრს, ბენიამინ ნეთანიაჰუს შეხვდა. ეს არის მისი მესამე ვიზიტი ისრაელში, ომის დაწყების შემდეგ.
• მან იმედი გამოთქვა, რომ ზავი კიდევ გაგრძელდებოდა და აქვე, აღნიშნა, რომ თუ ისრაელი გააგრძელებდა ომს და ჰამასზე თავდასხმები სამხრეთისკენაც გადაინაცვლებდა, ისრაელს უნდა ემოქმედა საერთაშორისო სამართლის ნორმების შესაბამისად და ასევე, უნდა ჰქონოდა მკაფიო გეგმა, მშვიდობიანი მოსახლეობის დასაცავად.
• მისივე თქმით, ისრაელის ლიდერებს ესმით, რომ დაღუპული და უსახლკაროდ დარჩენილი ადამიანების რაოდენობა, ღაზის ჩრდილოეთით, იმდენად მაღალია, რომ სამხრეთში იგივე არ უნდა განმეორდეს.
• ღაზის მოსახლეობის უდიდესი ნაწილი ახლა სამხრეთით მდებარე დასახლებებშია, მათ წასასვლელი არსად აქვთ, ამიტომაც ჩნდება კითხვა, თუ როგორ ჩაივლის ისრაელის თავდასხმები დიდი მსხვერპლის გარეშე.
• ნეთანიაჰუს ტყვეების ოჯახები კატეგორიულად სთხოვენ, დააბრუნოს გატაცებულები სამშობლოში, თუმცა მთავრობაში მყოფი მისი ულტრამემარჯვენე პარტნიორები, ასევე, მოითხოვენ, გააგრძელოს ომი, ვიდრე ჰამასი არ განადგურდება.

ბოლო ხაზი: ჰამასი ისრაელს თავს 7 ოქტომბერს დაესხა, მოკლეს 1200 ადამიანი, უმეტესობა — მშვიდობიანი მოქალაქე.

• 240-ზე მეტი ტყვედ წაიყვანეს.
• მას შემდეგ, ისრაელის დაბომბვას და სახმელეთო შეჭრას ღაზაში 13 ათასზე მეტი პალესტინელი ემსხვერპლა, მათგან ორი მესამედი ქალები და ბავშვები არიან.