რა ხდება: ცეცხლის შეწყვეტის შესახებ შეთანხმება, ისრაელსა და ჰამასს შორის, დღეს სრულდება. 4-დღიანმა ზავმა, საშუალება მისცა მხარეებს, გაეთავისუფლებინათ ტყვეები, პატიმრები და ასევე, ღაზის სექტორში შესულიყო ჰუმანიტარული დახმარება.

• გუშინ ჰამასმა 17 ტყვე გაათავისუფლა, მათ შორის არის 14 ისრაელელი და 1 ამერიკელი. გათავისუფლებული ტყვეების უმეტესობა პირდაპირ ისრაელს გადასცეს, ნაწილმა კი ღაზის სექტორი ეგვიპტის საზღვრიდან დატოვა.
• სანაცვლოდ, ისრაელმა 39 პალესტინელი პატიმარი გაათავისუფლა, უმეტესად — მოზარდი ბიჭები, რომლებსაც პოლიციისთვის ქვების სროლაში, ან — საკუთრების დაზიანებაში ადანაშაულებდნენ.

დეტალები ზავის შესახებ: მოლაპარაკებები კატარში მიმდინარეობდა და მას მხარს აშშ და ეგვიპტე უჭერდნენ.

• შეთანხმება ძალაში პარასკევს შევიდა. ზავი ითვალისწინებდა საომარი მოქმედებების შეჩერებას 4 დღით, ღაზის სექტორში ჰუმანიტარული ტვირთის შეტანას, ჰამასის ტყვეობიდან 50 ადამიანის გათავისუფლებას და ისრაელის ციხეებიდან 150 პალესტინელი პატიმრის გამოშვებას.
• პარასკევის შემდეგ, გათავისუფლდა 39 ტყვე და 117 პალესტინელი პატიმარი. ჰამასმა ისრაელს გადასცა 4 წლის გოგოც, აბიგაილ ედანი, რომლის მშობლები ჰამასის თავდასხმებს ემსხვერპლა ისრაელში, 7 ოქტომბერს. ბავშვს ისრაელისა და აშშ-ის ორმაგი მოქალაქეობა აქვს.
• "რაც მან გადაიტანა, წარმოუდგენელია", — თქვა აშშ-ის პრეზიდენტმა ჯო ბაიდენმა. მან არაფერი იცოდა გოგონას მდგომარეობის შესახებ.
• საერთო ჯამში, ტყვეების სიაში, რომლის გათავისუფლებასაც ელოდებიან, 9 ბავშვი იყო.
• ისრაელის პრემიერ-მინისტრი, ბენიამინ ნეთანიაჰუ აცხადებს, რომ ისრაელი გააგრძელებს შეტევას, როდესაც ზავი დასრულდება. ის იმყოფებოდა ღაზის სექტორში, სადაც ისრაელელ ჯარისკაცებს შეხვდა.
• "ჩვენ ყველას დავაბრუნებთ. ვაგრძელებთ ბრძოლას ბოლომდე, გამარჯვებამდე, ჩვენ ვერავინ შეგვაჩერებს", — თქვა ნეთანიაჰუმ.
• შეთანხმების მიღმა, გათავისუფლდა კიდევ 24 ტყვე. მათი უმეტესობა ტაილანდელია, რომლებიც ისრაელში მუშაობდნენ.
• გათავისუფლებული პალესტინელი პატიმრები კი ბავშვები და ახალგაზრდა კაცები არიან, უმეტესად, 15-დან 19 წლამდე. ისინი, ძირითადად, საპროტესტო აქციებზე, ან — სამართალდამცველებთან დაპირისპირების დროს იყვნენ დაკავებული.

რა მოხდება ზავის ამოწურვის შემდეგ: წუხელ ჰამასმა განაცხადა, რომ სურს ზავის კიდევ 2-დან 4 დღემდე გაგრძელება, რათა წინასწარ დაგეგმილზე მეტი პალესტინელი პატიმარი გათავისუფლდეს.

• ჰამასთან დაახლოებულმა წყარომ AFP-ს უთხრა, რომ შესაბამისი თხოვნით მედიატორებს უკვე მიმართეს.
• მეოთხე გაცვლა დღეს არის დაგეგმილი, ზავის ბოლო, მეოთხე დღეს. ეს არის მნიშვნელოვანი პაუზა 7-კვირიან ომში, რომელიც ისრაელ-პალესტინის დაპირისპირების განმავლობაში, ათწლეულების მანძილზე, ყველაზე სისხლიანი აღმოჩნდა. ომს 13 300-ზე მეტი პალესტინელი ემსხვერპლა, მათგან ორი მესამედი ქალები და ბავშვები არიან.
• 7 ოქტომბერს ჰამასის თავდასხმებს 1200-ზე მეტი ისრაელელი ემსხვერპლა. 200-ზე მეტი კი კვლავ ჰამასის ტყვეობაში რჩება.