რა ხდება: ჯანდაცვის მსოფლიო ორგანიზაციის ხელმძღვანელის თქმით, ღაზის ყველაზე დიდი საავადმყოფო აღარ ფუნქციონირებს.

  • ტედროს გებრეიესუსმა X-ზე დაწერა, რომ ალ-შიფას საავადმყოფოს, უკვე სამი დღეა, ელექტროენერგია აღარ მიეწოდება, ამოიწურა წყლის მარაგი.
  • "მსოფლიო ვერ იქნება მშვიდად, როდესაც საავადმყოფოები, რომლებიც მშვიდი თავშესაფარი უნდა იყოს, იქცა სიკვდილის, განადგურების და უიმედობის სცენებად",— დაწერა გებრეიესუსმა.

მას შემდეგ, რაც საავადმყოფომ ფუნქციონირება შეწყვიტა, ალ-შიფაში სამი ახალშობილი ბავშვი დაიღუპა. ექიმები ამბობენ, რომ სამედიცინო მზრუნველობის გარეშე დარჩენილ ჩვილებში მსხვერპლი გაიზრდება.

რა ხდება ღაზაში: გაეროს ინფორმაციით, შიფას საავადმყოფოსთან დაბომბვა და შეიარაღებული შეტაკებები, შაბათიდან, კიდევ უფრო ინტენსიური გახდა.

  • მათივე ცნობით, კრიტიკული ინფრასტრუქტურა, მათ შორის — ჟანგბადის გენერატორი, წყლის ავზები და ჭა, კარდიოვასკულარული საშუალებები და სამშობიარო განყოფილება დაზიანდა, მოკლულია სამი ექთანი.
  • თანამშრომლების და პაციენტების ნაწილმა გაქცევა შეძლო, თუმცა ღაზის ჯანდაცვის მინისტრის ინფორმაციით, შენობაში 2300 ადამიანია ჩარჩენილი. მათგან 600-დან 650-მდე პაციენტია, 200-დან 500-მდე — სამედიცინო მუშაკი და დაახლოებით, 1500 — დევნილი.
  • შენობაში დარჩენილებს აღარ აქვთ წყალი და საკვები.
  • ღაზის ჩრდილოეთი მთელი ღამის განმავლობაში იბომბებოდა.
  • ომის შედეგად დაღუპული პალესტინელების რაოდენობამ 11 ათასს გადააჭარბა.
  • 7 ოქტომბერს ჰამასის თავდასხმებს ისრაელის ტერიტორიაზე 1200 ადამიანი ემსხვერპლა, 200-ზე მეტი, ტერორისტებს ტყვედ ჰყავთ აყვანილი.