ომბუდსმენი ამბობს, რომ შსს-ს ადამიანის უფლებათა დაცვის დეპარტამენტის მოქმედი თანამშრომლის, გოგა რაზმაძის საქმეზე, რომელიც უწყების მაღალჩინოსნებს დისკრიმინაციაში ადანაშაულებს, შინაგან საქმეთა სამინისტრომ ბრალდების ყველა გარემოება გააქარწყლა.

გოგა რაზმაძის საქმის დეტალები: შსს-ს თანამშრომელმა ივლისში უწყების მაღალჩინოსნები ღირსების შემლახავ და დამამცირებელ მოპყრობაში დაადანაშაულა.

• თქვა, რომ ადამიანის უფლებათა დეპარტამენტში არსებულ პრობლემებზე საუბრისა და კრიტიკის შემდეგ, გენერალურ ინსპექციაში დაიბარეს და "საქმე გაურჩიეს".
• შს მინისტრის მოადგილემ, ალექსანდრე დარახველიძემ ბრალდებები უარყო.
• გუშინ კი, რაზმაძემ ფეისბუქზე დაწერა, რომ სახალხო დამცველმა მისი საქმის წარმოება შეწყვიტა ისე, რომ მან არ გამოჰკითხა არცერთი მოწმე, არ გამოითხოვა ინფორმაცია, რომელსაც საქმისთვის კრიტიკული მნიშვნელობა ჰქონდა.
• ასევე, რაზმაძის მტკიცებით, ომბუდსმენმა მის მიერ წარდგენილი "უტყუარი მტკიცებულებების" 1%-იც კი არ გაიზიარა.

რას ამბობს ლევან იოსელიანი: ომბუდსმენის აპარატმა წერილი გაავრცელა, სადაც აღნიშნულია, რომ

• შსს-მ, რომელსაც ჰქონდა მტკიცების ტვირთი, დაემტკიცებინა შევიწროების ფაქტის არარსებობა, წარმოადგინა განმცხადებლის მიერ მოწოდებული თითოეული გარემოების გამაქარწყლებელი არგუმენტაცია.
• ომბუდსმენი აღნიშნავს, რომ ყველა საქმის შესწავლის დროს, აპარატი მოქმედებს საქართველოს კანონმდებლობის და საერთაშორისო სტანდარტების შესაბამისად.
• ლევან იოსელიანმა თქვა, რომ არ გამოიკვეთა დამატებითი ახსნა-განმარტებების მოძიების და მოწმეების გამოკითხვის საჭიროება.
• "რაც შეეხება მიღებული გადაწყვეტილების სრულად გასაჯაროების საკითხს, იმის გათვალისწინებით, რომ სახალხო დამცველი პატივს სცემს და იცავს განმცხადებლის პერსონალურ მონაცემებს, სრული ტექსტის გამოქვეყნება მიზანშეუწონლად მიგვაჩნია", — წერს ომბუდსმენი.

საქმეს გამოეხმაურა საქართველოს ახალგაზრდა იურისტთა ასოციაცია:

მათი ანალიზის მიხედვით,

• გოგა რაზმაძის საქმეზე სახალხო დამცველის გადაწყვეტილება არ ეფუძნება გარემოებების სრულყოფილ გამოკვლევას, დაუსაბუთებელი და მიკერძოებულია შინაგან საქმეთა სამინისტროს სასარგებლოდ.
• "მოწმეების გამოკითხვის, სამინისტროსთვის კითხვების დასმისა და დოკუმენტაციის გამოთხოვის გარეშე, ომბუდსმენმა ფაქტობრივად განმცხადებელი დაავალდებულა, რომ თავად მოეპოვებინა მტკიცებულებები. საქმის მსგავსი გადაწყვეტა მტკიცების ტვირთის შებრუნებაა, რაც სრულად ეწინააღმდეგება დისკრიმინაციის საქმეებზე ეროვნული და საერთაშორისო კანონმდებლობითა და პრაქტიკით დადგენილ სტანდარტებს," - აცხადებს საია.