რა ხდება: სახალხო დამცველმა ლევან იოსელიანმა შეწყვიტა შინაგან საქმეთა სამინისტროს თანამშრომლის, გოგა რაზმაძის საქმე, რომელშიც ის შს მინისტრს და მისი დეპარტამენტის უფროსს დისკრიმინაციულ მოპყრობას ედავებოდა.

  • ამის შესახებ "ფეისბუქზე" თავად რაზმაძე წერს.

კონტექსტი: 12 ივლისს შსს-ის თანამშრომელმა, გოგა რაზმაძემ სოციალურ ქსელში ვრცელი პოსტი გამოაქვეყნა, სადაც უწყების მაღალჩინოსნების მხრიდან ღირსების შემლახავ და დამამცირებელ მოპყრობაზე ისაუბრა.

  • ჰყვებოდა, რომ ადამიანის უფლებათა დეპარტამენტში არსებულ პრობლემებზე საუბრისა და კრიტიკის შემდეგ, გენერალურ ინსპექციაში დაიბარეს და "საქმე გაურჩიეს".
  • შს მინისტრის მოადგილემ, ალექსანდრე დარახველიძემ ბრალდებები უარყო.

რას წერს რაზმაძე ომბუდსმენზე: ის ამბობს, რომ ივლისში, მის მიმართ განხორციელებულ დამამცირებელ მოპყრობამდე 15 დღით ადრე სთხოვა შეხვედრა ლევან იოსელიანს.

  • რაზმაძის თქმით,ომბუდსმენმა ამისთვის ვერ მოიცალა, თუმცა შეხვდა ალექსანდრე დარახველიძეს, რომლის წინააღმდეგაც საქმეს განიხილავდა.
  • სახალხო დამცველმა არ გამოჰკითხა არცერთი მოწმე, არ გამოითხოვა ინფორმაცია, რომელსაც საქმისთვის კრიტიკული მნიშვნელობა ჰქონდა.
  • "გადაწყვეტილების "დასაბუთებისას" სახალხო დამცველმა გაითვალისწინა მინისტრის მოადგილის, ალექსანდრე დარახველიძის და დეპარტამენტის დირექტორის, გიორგი ოსაძის პოზიციების 100%, რომელთა გასაბათილებლად წარვადგინე დაახლოებით 500 გვერდი უტყუარი მტკიცებულება, რომელთა 1%-იც არ გაიზიარა ლევან იოსელიანმა," - წერს გოგა რაზმაძე.
  • ის ფიქრობს, რომ გადაწყვეტილებით ომბუდსმენმა "მწვანე შუქი აუნთო მინისტრის მოადგილეს და გენერალურ ინსპექციას მის წინააღმდეგ შემდგომი რეპრესიების განხორციელების პროცესში."
  • "რაც შეეხება ჩემს გეგმებს, მინდა მივმართო ამ უკანონო და უსამართლო პროცესში ჩართულ თითოეულ ადამიანს - დანებებას არ ვაპირებ", - წერს გოგა რაზმაძე.

On.ge-მ სცადა ამ საკითხზე, სახალხო დამცველთან, ლევან იოსელიანთან კომუნიკაცია. ომბუდსმენს ჩვენს კითხვაზე ჯერ არ უპასუხია.