მოკლედ: პარტია ქართული ოცნების თავმჯდომარის, ირაკლი კობახიძის განცხადებით, პარლამენტში მიმდინარე სასესიო კვირის ბოლომდე შედგება კენჭისყრა, იმპიჩმენტის წესით, სალომე ზურაბიშვილის საქართველოს პრეზიდენტის თანამდებობიდან გადაყენების თაობაზე.

  • საფუძველი კი საკონსტიტუციო სასამართლოს დღევანდელი დასკვნაა, რომლის მიხედვით, პრეზიდენტმა "მთავრობის უნებართვო ვიზიტების განხორციელების გამო" კონსტიტუცია დაარღვია.

რა თქვა ირაკლი კობახიძემ:

  • მიმდინარე კვირაში პარლამენტის უმრავლესობა დაადასტურებს, რომ "ის აღარ არის ღირსი პრეზიდენტის მაღალ სტატუსს ატარებდეს".
  • "ზურაბიშვილს რომ ჰქონდეს შერჩენილი ელემენტარული ღირსება, საკონსტიტუციოს გადაწყვეტილების შემდეგ ის მყისიერად გადადგებოდა თანამდებობიდან. თუმცა, გვესმის, რომ ზურაბიშვილი არ არის დამოუკიდებელი თავის გადაწყვეტილებებში და ის ვერც გადადგომის გადაწყვეტილებას მიიღებს იმ ძალების გარეშე, რომლებიც მას საქართველოს კონსტიტუციის უხეში დარღვევისკენ უბიძგებდნენ," — თქვა მან.

პროცედურულად: პრეზიდენტი ჩაითვლება იმპიჩმენტის წესით თანამდებობიდან გადაყენებულად, თუ ამ გადაწყვეტილებას მხარი დაუჭირა საქართველოს პარლამენტის სრული შემადგენლობის არანაკლებ ორმა მესამედმა.

პოლიტიკური კონტექსტი: მმართველ პარტიას, ქართულ ოცნებას, პარლამენტში არ ჰყავს პრეზიდენტის თანამდებობიდან გადაყენებისთვის საჭირო 100 დეპუტატი — ანუ პარლამენტის სრული შემადგენლობის ორი მესამედი.

  • იმპიჩმენტის პროცესისთვის მათ სჭირდებათ ოპოზიციონერი დეპუტატების მხარდაჭერა.

კობახიძე ამბობს, რომ არ აქვს იმედი, რომ ოპოზიცია ზურაბიშვილის იმპიჩმენტს მხარს დაუჭერს.