რატომ არის მნიშვნელოვანი: 27 ივნისს, კარფურის ჰიპერმარკეტთან ფორმულას ერთ-ერთ დამფუძნებელს, მიშა მშვილდაძეს უცნობი პირი თავს დაესხა და ფიზიკურად გაუსწორდა.

  • "სახეში მუშტი დამარტყა. მერე ფეხი წამოვკარი კიბეს და წავიქეცი, წამოდგომა ვერ მოვახერხე და ის უკნიდან ცდილობდა, რომ ერტყა და ერტყა კიდევ", — უთხრა მშვილდაძემ ფორმულას.
  • მოგვიანებით, სოციალური ქსელის მომხმარებელმა, ნიკოლოზ გუგეშაშვილის სახელით დაწერა, რომ მშვილდაძეს თავს ის დაესხა.
  • პოსტის ავტორი ჰომოფობიურ ფრაზებს აჟღერებდა და ამტკიცებდა, რომ რომ მშვილდაძეს რელიგიისადმი დამოკიდებულების გამო სცემა.

დეტალები: ფორმულა ამბობდა, რომ მშვილდაძეზე თავდასხმის ერთ-ერთი ფიგურანტი სახელმწიფო უსაფრთხოების სამსახურის გამომძიებელი, გიორგი მუმლაძეა.

  • ტელეკომპანიაში ამბობდნენ, რომ რომ მუმლაძე ბოლომდე ესწრებოდა თავდასხმის პროცესს და მეწყვილესთან ერთად ყველაზე ბოლომ დატოვა შემთხვევის ადგილი.
  • მაშინ სუს-ში On.ge-ს განუცხადეს, რომ ფორმულას თანამშრომლებმა გამოძიებას უნდა მიმართონ.
  • 6 ივლისს, სპეციალურმა საგამოძიებო სამსახურმა გაავრცელა განცხადება, რომ მიხეილ მშვილდაძის მიმართ განხორციელებული ძალადობის ფაქტზე დაწყებული სისხლის სამართლის საქმე გამოსაძიებლად მათ გადაეცათ.
  • 12 სექტემბერს კი მშვილდაძემ თქვა, რომ საგამოძიებომ ეს საქმე დახურა.
  • დაზარალებული დავის საერთაშორისო სასამართლოში გაგრძელებას აპირებს.

დღეს, ცნობილი გახდა საქალაქო სასამართლოს გადაწყვეტილება — თავდამსხმელს, ნიკოლოზ გუგესაშვილს, 6 თვით თავისუფლების აღკვეთა მიესაჯა.

  • "განაჩენი ჩაგვბარდება, გავეცნობი და ამის შემდეგ გადავწყვეტ, ამ განაჩენს გავასაჩივრებ თუ არა", — განაცხადა პროკურორმა.
  • მისი მტკიცებით, გამოძიებისას გამოთხოვილი ინფორმაციის ანალიზის შედეგად არ დადგინდა, რომ გუგესაშვილი მოქმედებდა ჯგუფურად ან ვინმეს დავალებით.