რატომ არის მნიშვნელოვანი: ეს პირველი შემთხვევა არ არის, როცა ქართული ოცნება გელა მთივლიშვილსა და მის გამოცემა მთის ამბებს თავს ესხმის.

  • განსაკუთრებული კრიტიკის სამიზნე მთივლიშვილი შოვის სტიქიის დროს გახდა.
  • მთის ამბები ერთ-ერთი პირველი იყო, ვინც სტიქიის ზონიდან ინფორმაციებს ავრცელებდა.
  • პარლამენტის თავმჯდომარემ, შალვა პაპუაშვილმა გამოცემის რედაქტორი მაშინ ყალბი ინფორმაციის გავრცელებაში დაადანაშაულა.

რა ხდება ახლა: ქართულ ოცნებასა და მედიას შორის არსებული პრობლემური ურთიერთობა ყურადღების ცენტრში კიდევ ერთხელ მოექცა, როცა OC Media-მ გაავრცელა ინფორმაცია, რომ შალვა პაპუაშვილმა მათ დონორებზე ზეწოლა სცადა მას შემდეგ, რაც მისი მოსაზრების გამოქვეყნებაზე უარი უთხრეს.

  • პარლამენტის თავმჯდომარე სწორედ OC Media-სთან დაკავშირებულ კითხვებს პასუხობდა, როცა გელა მთივლიშვილი ახსენა და მისი კრიტიკა დაიწყო.
  • მისი თქმით, მთივლიშვილი შოვის ამბების დროს ტყუილებს ავრცელებდა და ამით პანიკას თესდა.
  • "ამ დროს ტყუილებით პანიკის თესვა, ეს ჟურნალისტიკა არ არის, ეს არის პოლიტიკური აქტივისტობა", — თქვა პაპაუაშვილმა.
  • პარლამენტის თავმჯდომარემ, ასევე, შეუტია საქართველოს ჟურნალისტური ეთიკის ქარტიასაც, რომელმაც პაპუაშვილი OC Media-ზე ზეწოლის გამო გააკრიტიკა.
  • "სამწუხაროა, რომ ქარტია აბსოლუტურად აცდენელია საკუთარ ამოცანებს", — აღნიშნა პარლამენტის სპიკერმა.
  • პაპუაშვილთან ერთად, გელა მთივლიშვილს ირაკლი კობახიძეც ესხმის თავს და მას "სამარცხვინო კაცს" უწოდებს.
  • მისი თქმით, "არაფერი კავშირი არ აქვს მედიასთან და ჟურნალისტიკასთან გელა მთივლიშვილს".

დეტალები: ქართული ოცნების მორიგ თავდასხმას გელა მთივლიშვილზე გამოეხმაურა მედიის ადვოკატირების კოალიცია.

  • "საქართველოს პარლამენტის თავმჯდომარის და ხელისუფლების სხვა წარმომადგენლების მხრიდან თავდასხმები თავისუფალ, მიუკერძოებელ ჟურნალისტებზე არის ნიშანი იმისა, რომ ხელისუფლება ცდილობს ზეწოლას იმ მედიაზე, რომელსაც ვერ აკონტროლებს", — აღნიშნულია კოალიციის განცხადებაში.