თიბისი სტარტაპერის პარტნიორი, კიდევ ერთი კომპანია სანტი, რომელმაც უკვე არაერთი ეზო და გარე სივრცე გაალამაზა, ჯერ ერთი წლისაც არ არის, თუმცა ამ მოკლე დროში უკვე ბევრი წარმატებული პროექტი განახორციელა. სანტის წარმატების ისტორიაზე მისი დამფუძნებელი, გიგი ტაბაღუა საუბრობს.

გიგი იხსენებს, რომ კომპანიის დაფუძნების იდეა კოპენჰაგენში გაუჩნდა, სადაც გაცვლითი პროგრამით სასწავლებლად იმყოფებოდა

"კოპენჰაგენში განსაკუთრებით თვალშისაცემია მოვლილი ეზოები, საგანგებოდ დაგეგმილი, ნაფიქრი და ამა თუ იმ დიზაინში გადაწყვეტილი სივრცეები. ჩემი პროფესიიდან გამომდინარე, მათ ყოველთვის დიდი ინტერესით ვათვალიერებ. იქ ყოფნისას კი გაჩნდა იდეა, ასეთი ლამაზი მწვანე სივრცეები ჩემს ქალაქშიც შემექმნა. დღემდე ვმართავ რამდენიმე მცირე ბიზნესს და მაქვს დიდი გამოცდილება სტარტაპ პროექტებში. ამიტომაც, მარტივი იყო, იდეა რეალობად მექცია", — ამბობს გიგი.

თავდაპირველად, გიგი და მისი თანადამფუძნებლები თავად მიდიოდნენ რუსთავის მოსახლეობასთან და ეზოების მოწყობას სთავაზობდნენ. თუმცა, ამ მიმართულებით ცნობადობის ნაკლებობის გამო, ადამიანები ინიციატივას ადვილად არ თანხმდებოდნენ. რამდენიმე წარმატებული შეკვეთის შემდეგ გუნდის შესახებ ინფორმაცია გავრცელდა და კმაყოფილი მომხმარებლებიც ნელ-ნელა შეიძინეს.

"ამ პერიოდში დაახლოებით 20 -მდე წარმატებული პროექტი განვახორციელეთ. კმაყოფილმა მომხმარებელმა და დაგროვილმა გამოცდილებამ მიგვახვედრა, რომ კომპანია ოფიციალურად უნდა დაგვერეგისტრირებინა. ამ მიზნით მივმართეთ თიბისი სტარტაპერს, რომელიც გვენდო, გვერდით დაგვიდგა და დავაფუძნეთ კომპანია — სანტი", — აღნიშნავს გიგი.

თიბისის მხარდაჭერით, მაღალი ხარისხის ტექნიკა და სხვა საჭირო ინვენტარი შეიძინეს. ასევე, თითქმის დაასრულეს კომპანიის ოფიციალურ ვებგვერდზე მუშაობა და სულ მალე Facebook და Instagram გვერდებსაც აამუშავებენ.

"დღეისათვის, კომპანია სანტი კერძო პირებს, სამშენებლო კომპანიებსა და სხვა იურიდიულ პირს სთავაზობს სრულ ლანდშაფტურ მომსახურებას, ეზოებისა და გარე სივრცეების დაგეგმარებას, განაშენიანებას, მოვლა-პატრონობასა და დასუფთავებას (ერთჯერადად და მრავალჯერადად). აქამდე მომსახურებას მხოლოდ რუსთავში ვთავაზობდით, ამ დროისთვის კი ჩვენი გამოცდილება, დაგროვილი ცოდნა და რესურსი საშუალებას გვაძლევს, საქართველოს სხვა ქალაქებშიც მოვემსახუროთ მომხმარებელს", — ამბობს გიგი.

გიგის თქმით, მათი მთავარი ამოცანა ქალაქში, რაც შეიძლება ბევრი მწვანე კუთხის შექმნაა და მიზნად ისახავენ, რომ ღირსეული ადგილი დაიმკვიდრონ ქართულ ბაზარზე.

"ბიზნეს ხედვებთან ერთად, ჩვენი გუნდი აქტიურად მუშაობს იმ იდეებზე, რითაც, პირველ რიგში, ქალაქ რუსთავს ახალ-ახალ მწვანე სივრცეებს შეუქმნის. ამჟამად სანტიში 5 ადამიანია დასაქმებული. თუმცა, სამომავლოდ, მათი რიცხვი ჩვენი გეგმებისა და ამბიციების შესაბამისად გაიზრდება", — აღნიშნავს გიგი.