რატომ არის მნიშვნელოვანი: ქართული ოცნების ინიციატივით, ცენტრალური საარჩევნო კომისიის დაკომპლექტების წესი არაერთხელ შეიცვალა.

  • უკანასკნელ ცვლილებებს 26 ივნისს სალომე ზურაბიშვილმა ვეტო დაადო, რომელიც 3 ივლისს პარლამენტმა დაძლია.
  • მმართველი პარტიის გადაწყვეტილებით, ცესკოს თავმჯდომარეობის კანდიდატებს, პრეზიდენტის ნაცვლად, პარლამენტი წარადგენს, ცესკოს არაუმეტეს 9 წევრს კი პარტიები დანიშნავენ.
  • სალომე ზურაბიშვილს მიაჩნია, რომ ასეთ თანამდებობებზე ერთპარტიული დანიშვნები სახელმწიფოებრიობასა და ევროპულ მომავალს ეწინააღმდეგება.

რა იგეგმება ამჯერად: გივი მიქანაძის განცხადებით, მმართველმა გუნდმა მიიღო გადაწყვეტილება, საარჩევნო კოდექსსა და პარლამენტის რეგლამენტში ცვლილებათა პაკეტი დააინიციიროს.

  • დეპუტატის განმარტებით, ცესკოს თავმჯდომარისა და წევრების 5 წლის ვადით ასარჩევად, 76-ის ნაცვლად, 90 ხმა იქნება საჭირო.
  • მიქანაძის თქმით, თუ კანდიდატი 90 ხმას ვერ დააგროვებს, ორჯერ შეეძლება, 76 ხმით მხარდაჭერის მიღება სცადოს.
  • თუ კანდიდატებს ამ გზითაც ვერ აირჩევენ, საკითხს პრეზიდენტი გადაწყვეტს.

დეტალები: მიქანაძე ამბობს, რომ ცვლილებები 12-პუნქტიანი გეგმის შუალედური შეფასებითაა განპირობებული.

  • "გამომდინარე იქიდან, რომ ჩვენთვის არსებითად მნიშვნელოვანია ცესკოს მალევე, წლის ბოლომდე დაკომპლექტება, რომ ცესკო უფლებამოსილი, გამართული და სრულად ფუნქციონირებადი იყოს იმ კანონმდებლობის განსახორციელებლად, რომელიც მივიღეთ 12-პუნქტიანი გეგმის ფორმატში, ჩვენ ვაინიციირებთ ამ ინიციატივას დაჩქარებული წესით", — თქვა მან.
  • მმართველი გუნდი ცვლილებების მიღებას სექტემბრის ბოლომდე აპირებს.
  • "თუ ჩვენს ოპონენტებს ამ პერიოდის განმავლობაში რაიმე დამატებითი წინადადებები ან შემოთავაზებები ექნებათ, დრო საკმარისია მათ წარმოსადგენად", — განაცხადა მიქანაძემ.