თალიბანმა ავღანეთის სილამაზის სალონებს დახურვის ბრძანება გასცა. ე.წ. მორალის პოლიციის თქმით, სალონებს დასაკეტად ერთი თვე ექნებათ, ათვლა კი ბრძანების გაცემის დღიდან, 2 ივლისიდან დაიწყო.

ეს არაა პირველი შემთხვევა, როდესაც თალიბანმა ქალებისთვის აკრძალვები შემოიღო. მათ შეზღუდვები ჯერ კიდევ პირველი მმართველობისას, 1996-2001 წლებში დაიწყეს, შემდგომ კი, იმავე პოლიტიკა 2021 წელს ხელისუფლებაში მოსვლისთანავე გააგრძელეს.

თავდაპირველად ეს შეზღუდვები ქალების გარეგნობას შეეხო — მათ ქუჩაში ისე უნდა დაეფარათ სხეული, რომ მხოლოდ თვალები გამოეჩინათ. ასევე, ქალებს არ აქვთ უფლება, სახლიდან 72 კილომენტრზე შორს ნათესავი კაცის გარეშე გადააადგილდნენ. მიუხედავად გამოთქმული პროტესტისა და მსოფლიოში აქტივისტების აქტიურობისა, შეზღუდვები აქ არ მთავრდება — თალიბანმა ქალებს სკოლაში, უნივერსიტეტებში, სავარჯიშო დარბაზსა და პარკებში სიარული, ახლახანს კი, გაეროსა და არასამთავრობო ორგანიზაციებში მუშაობაც აუკრძალა, რასაც ახლა სილამაზის სალონებიც დაემატა.

ავღანელი ქალები BBC-სთან ინტერვიუში ანონიმურად აცხადებენ, რომ სალონების დაკეტვა ქაბულსა და სხვა ქალაქებში უკვე დაიწყო, თუმცა მათი ნაწილი დახურვაზე უარს აცხადებს. ქალების თქმით, თალიბანი მათ ძირითად უფლებებს ართმევს.

"ეს ამბავი რომ გავიგე, შოკში ვიყავი. როგორც ჩანს თალიბებს არანაირი პოლიტიკური გეგმა არ აქვთ, გარდა ქალების სხეულზე ფოკუსირებისა. ისინი ცდილობენ ქალები ყველანაირი საჯარო სივრციდან გააქრონ", — აცხადებს ერთ-ერთი რესპოდენტი.

მართალია, სალონები 2021 წელს თალიბების ხელისუფლებაში მოსვლის შემდეგ ღია რჩებოდა, თუმცა ძირითადად მათი ვიტრინები დაფარული იყო, ხოლო ფოტოები, რომლებზეც ქალების სახეები ჩანდა, გადაღებილი. თალიბანს არ აუხსნია, რა იყო აკრძალვის მიზეზი და არც ის უთქვამს, ქალებს რაიმე სახის ალტერნატივას შესთავაზებს, თუ არა.