ლეგენდარულმა ქართველმა მიზანში მსროლელმა ნინო სალუქვაძემ ვროცლავში მიმდინარე ევროპულ თამაშებზე 2024 წლის ოლიმპიადაზე მონაწილეობის უფლება მოიპოვა. ოლიმპიური ჩემპიონისთვის ეს ზედიზედ მე-10 ოლიმპიადა იქნება — მასშტაბურ სპორტულ შეჯიბრში იგი 1988 წლის შემდეგ მუდმივად ასპარეზობს.

აღსანიშნავია, რომ სალუქვაძემ რეკორდი ჯერ კიდევ 2021 წელს, ტოკიოს ოლიმპიურ თამაშებზე დაამყარა. იგი ამ დრომდე ერთადერთი ქალი სპორტსმენია, რომელმაც ოლიმპიურ სარბიელზე ცხრაჯერ გაიარა.

ნინო ამბობს, რომ მე-10 ოლიმპიადაზე მონაწილეობისკენ მამამისმა, ვახტანგ სალუქვაძემ (რომელიც მისი მწვრთნელიც იყო) და შვილმა, ასევე მიზანში მსროლელმა ცოტნე მაჭავარიანმა უბიძგეს.

"ეს ჩემთვის კი არა, ჩემი ქვეყნისთვისაა მნიშვნელოვანი", — აღნიშნა სალუქვაძემ ვროცლავის თამაშებზე გამოსვლამდე, — "საქართველო ძალიან პატარა ქვეყანაა და მსოფლიო მოსახლეობის ალბათ 80%-მა არც კი იცის, სად მდებარეობს ის. ასე რომ, თუ ამას მივაღწევ, იქნებ ჩემს პატარა, უმშვენიერეს სამშობლოზე შეიტყონ".

აღსანიშნავია, რომ 2016 წელს, რიო-დე-ჟანეიროს თამაშებზე ნინო და ცოტნე გახდნენ პირველი დედა-შვილი, რომლებმაც ოლიმპიადაზე ერთად იასპარეზეს.

ნინო სალუქვაძე და ცოტნე მაჭავარიანი

ფოტო: Shakh Aivazov / AP

სამგზის ოლიმპიური მედალოსანი 54 წლისაა, მაგრამ ამბობს, რომ მიზანში სროლისთვის ასაკს მნიშვნელობა არ აქვს.

"ფიზიკურად დიდი მომზადება არ გჭირდება, უბრალოდ, ხელში პისტოლეტი უნდა დაიკავო", — ამატებს ქართველი ოლიმპიელი, — "ჩვენი სპორტი უმეტესწილად ფსიქოლოგიური [გამოცდაა], საკუთარი აზრების კონტროლი უნდა შეძლო".

ნინო სალუქვაძის ოლიმპიური დებიუტი 1988 წლის სეულის თამაშებზე შედგა, როცა მან ოქროს და ვერცხლის მედლები მოიპოვა. სპორტსმენს კარიერის განმავლობაში 90-მდე მედალი აქვს მიღებული.