რატომ არის მნიშნველოვანი: ბოლო რამდენიმე თვეა ევგენი პრიგოჟინმა საჯარო მიმართვებში რუსეთის სამხედრო ხელმძღვანელების ლანძღვა-გინება დაიწყო და ისინი ხელის შეშლაში, იარაღის არმიწოდებაში დაადანაშაულა.

• ის მინისტრ შოიგუს სამხედრო ტრიბუნალითაც ემუქრებოდა და არაერთხელ თქვა, რომ ბახმუტს დატოვებდა, საბოლოოდ, ასეც მოიქცა.
• გუშინ პრიგოჟინმა განაცხადა, რომ ვაგნერის პოზიციები ზურგიდან დაბომბა რუსული არმიის დანაყოფებმა, ამიტომ 25 000-იანი ჯგუფით შურისძიება დააანონსა.
• ტრადიციულად, რუსეთის თავდაცვამ ამას ტყუილი და პროვოკაცია უწოდა მის წინააღმდეგ კი აღიძრა საქმე შეიარაღებული აჯანყებისკენ მოწოდებაზე.
• თავად პრიგოჟინი ამბობდა, რომ "ეს არ არის სამხედრო გადატრიალება, ეს არის სამართლიანობის მარში".
• გვიან ღამით მან განაცხადა, რომ ვაგნერელებმა რუსეთის საზღვარი ყველა ადგილას გადაკვეთეს და როსტოვში შედიან, დილას კი თქვა, რომ როსტოვში ყველა სამხედრო პუნქტს აკონტროლებს და მოსკოვისკენ მიდიან.
• მოსკოვში, მოსკოვისა და ვორონეჟის ოლქებში კონტრტერორისტული ოპერაციის რეჟიმი ამოქმედდა.

რა თქვა პუტინმა: ქვეყანაში სამხედრო გადატრიალების დროსაც კი მან დრო იპოვა, რომ რუსეთის წინააღმდეგ დასავლეთის სამხედრო მანქანის მოქმედებაზე ელაპარაკა.

• ვაგნერზე და პრიგოჟინზე საუბრისას პუტინმა გამოიყენა სიტყვები ზურგში დარტყმა და ღალატი, ისაუბრა ერთიანობის აუცილებლობასა და მოსალოდნელ მკაცრ სასჯელზეც.
• "ჩვენ დავიცავთ როგორც ჩვენს ხალხს, ასევე ჩვენს სახელმწიფოებრიობას ყოველგვარი საფრთხისგან. მათ შორის შინაგანი ღალატისგან", — აღნიშნა მან და დაამატა, რომ გადაჭარბებულმა ამბიციებმა და პირადმა ინტერესებმა პრიგოჟინი ღალატამდე მიიყვანა.
• "ვიმეორებ, ნებისმიერი შიდა არეულობა სასიკვდილო საფრთხეა ჩვენი სახელმწიფოებრიობისთვის, ჩვენთვის, როგორც ერისთვის. ეს არის დარტყმა რუსეთისთვის, ჩვენი ხალხისთვის. და ჩვენი ქმედებები, რათა დავიცვათ სამშობლო ასეთი საფრთხისგან, იქნება მკაცრი", — ამბობდა ის და თან ამტკიცებდა, თითქოს ყველაფერს გააკეთებს ხალხის დასაცავად.

რა უპასუხა მას პრიგოჟინმა: ვაგნერის ხელმძღვანელმა ბოლო თვეებში ბევრჯერ აგინა რუსეთის სამხედრო ხელმძღვანელობას, თუმცა პირდაპირ არასდროს ახსენებდა პრეზიდენტს, ახლა კი განაცხადა, რომ პუტინი ძალიან ცდება, როცა სამშობლოს ღალატზე საუბრობს.

• "ჩვენ სამშობლოს პატრიოტები ვართ, ვიბრძოდით და ვიბრძვით. და არავინ აპირებს თავის ჩაბარებას პრეზიდენტის, FSB-ს ან ვინმეს მოთხოვნით. იმიტომ, რომ ჩვენ არ გვინდა, რომ ქვეყანა კორუფციაში, მოტყუებასა და ბიუროკრატიაში ცხოვრობდეს", — განაცხადა მან მიმართვაში.
• "როცა გვითხრეს, რომ ვებრძვით უკრაინას, ჩვენ მივდიოდით და ვიბრძოდით, მაგრამ გაირკვა, რომ საბრძოლო მარაგები, შეიარაღება, მთელი ფული, რომელიც ამისთვის იყო გათვლილი, ასევე მოიპარეს. ჩინოვნიკები კი სხედან და ამ ფულს ინახავენ თავისთვის, ზუსტად ისეთი დღისთვის, როგორიც დადგა ახლა, როცა ვიღაცა მიდის მოსკოვისკენ", — განაცხადა მან.
• პრიგოჟინმა თქვა, რომ ახლა რუსეთის თავდაცვა არ ზოგავს რესურსებს და თვითმფრინავებიდან ბომბავს მშვიდობიან კოლონებს.
• "ჩვენ პატრიოტები ვართ და დღეს ვინც ჩვენს წინააღმდეგაა ისინი არიან, ვინც ნაძირლების ირგვლივ შეიკრიბნენ", — თქვა მან.