ამის შესახებ კინოცენტრის ყოფილი დირექტორი ფეისბუქგვერდზე წერს.

რატომ არის მნიშვნელოვანი: 14 მარტს კულტურის სამინისტრომ კინოცენტრის დირექტორი, გაგა ჩხეიძე თანამდებობიდან გაათავისუფლა, მისი მოვალეობის შემსრულებლად კი დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის ყოფილი მოადგილე, კობა ხუბუნია დანიშნა.

• მან კინოცენტრის დირექტორის მოადგილის ორი პოსტი გააუქმა და ცენტრში რეორგანიზაცია გამოაცხადა.
• 13 ივნისს პროპაგანდისტული და სახელისუფლებო POSTV-ის წამყვანმა, ბაჩო ოდიშარიამ, რომელსაც გადაცემა სექსუალურ შევიწროებაში არაერთგზის მხილებულ შალვა რამიშვილთან ერთად მიჰყავს, ფორმულასთან დაადასტურა, რომ ცენტრში კინოწარმოების დეპარტამენტის უფროსის მოადგილედ დაინიშნა.
• თქვა, რომ რეორგანიზაციის საკითხებში ჩაერთვება და გაიგებს, "ვის რა პრობლემები აქვს, ვის რა აწუხებს".
• ჟურნალისტის კითხვაზე, რამიშვილთან მუშაობა უქმნის თუ არა უხერხულობას და უშლის თუ არა ხელს კინოცენტრში საქმიანობას, ოდიშარია ამბობს, რომ "არანაირად".

რას აპროტესტებენ თანამშრომლები: კინოცენტრში დასაქმებულები რეორგანიზაციას აღიქვამენ მინისტრ თეა წულუკიანის მცდელობად, ქართული კინო კულტურის სამინისტროს პოლიტიკური გავლენის ქვეშ მოექცეს და "კინოცენტრის ხელთ არსებული ყველა ბერკეტი კინოსექტორზე სრულმასშტაბიანი კონტროლის დამყარებისკენ მიიმართოს".

• მათ კინოცენტრის ფეისბუქ გვერდზე ღია წერილიც გამოაქვეყნეს, სადაც დამოუკიდებლობის შენარჩუნებას ითხოვდნენ, თუმცა განცხადება სოციალური ქსელიდან მალევე წაიშალა.
• ახლა კინოცენტრის თანამშრომლები მოითხოვენ: შეწყდეს რეორგანიზაციის პროცესი, სადაც ცენტრს კონკურსის გზით დანიშნული დირექტორი არ ეყოლება;
• კინოცენტრის დირექტორი დაინიშნოს კონკურსის საფუძველზე და არა მინისტრის ერთპიროვნული გადაწყვეტილებით;
• დირექტორის შესარჩევი კომისია დაკომპლექტდეს კინოსექტორის წარმომადგენლებისგან.

რას ამბობს სამინისტრო: კულტურის სამინისტრო კინოცენტრში განვითარებულ პროცესებს უსაფუძვლო აჟიოტაჟს უწოდებს, რომლის მიზანიც, მათივე შეფასებით, საზოგადოებისთვის მცდარი ინფორმაციის მიწოდებაა.

• სამინისტრო ამტკიცებს, რომ ცენზურის ბრალდება პოლიტიკურად ანგაჟირებული პროცესის ნაწილია და ოპოზიციური პოლიტიკური ჯგუფის ოფისში ქართული კინოს წინააღმდეგ ჩაფიქრებული ნაბიჯია.
• რეორგანიზაციას კი, რომელსაც თანამშრომლები და კულტურის სფეროს წარმომადგენლები აპროტესტებენ, უწყება სისტემის რეფორმის პირველ ნაბიჯს უწოდებს.
• უწყება ირწმუნება, რომ სურთ ნეპოტიზმის აღმოფხვრა, კონკურსების გამართული და მეტად სამართლიანი მოდელის დანერგვა, საერთაშორისო ასპარეზზე ქართული კინოს მეტად წარმოჩენა, კერძო ინვესტორების მოზიდვაში ხელოვანთა მხარდაჭერა და საბოლოო ჯამში, კინოცენტრის, როგორც სახელმწიფო ინსტიტუტის, გაძლიერება.

დეტალები: ჩხეიძე კულტურის სამინისტროს განცხადების იმ ნაწილს ეხმაურება, სადაც კინოცენტრის დირექტორის მოვალეობის შემსრულებლად კობა ხუბუნიას დანიშნვაზეა საუბარი.

• მთლიანად განცხადებას კი პოლიტიკურად ანგაჟირებულს, ცინიზმით, ყალბი პათეტიკითა და სიცრუით სავსეს უწოდებს.
• დაუშვებლად მიიჩნევს იმას, რომ რეორგანიზაციასა და მით უმეტეს, რეფორმას ხელმძღვანელობდეს ადამიანი, რომელსაც კინოს სფეროსთან შეხება არასდროს ჰქონია.
• შემდეგ კი კობა ხუბუნიასთან სამსახურებრივი ურთიერთობის პერიოდს იხსენებს.

ჩხეიძე ჰყვება, რომ მასთან ხშირი კონტაქტი 2022 წლის იანვარში ჰქონდა. მისი თქმით, წულუკიანის დავალებით, ხუბუნიამ უთხრა, რომ არ მინისტრი არ დაუმტკიცებდა ბიუჯეტს, სანამ გრაფაში, თანხის დამატების მიზნით, მისთვის სასურველ ორ პროექტს არ ჩასვამდა.

• "როგორც ჩანს, მინისტრი პირადად დაპირდა პროექტების ავტორებს თანხის დამატებას და საკუთარი მითითების შესრულება კობა ხუბუნაიას დაავალა. ეს იყო შანტაჟი სამინისტროს მხრიდან, განხორციელებული კობა ხუბუნაიას ხელით".
• ყოფილი დირექტორის თქმით, ხუბნია დაემუქრა, რომ თუ მოთხოვნა არ შესრულდებოდა, სამინისტრო კინოცენტრს ბიუჯეტს არ დაუმტკიცებდა და ხელფასებს ვერ გასცემდნენ.
• "მე უარით ვუპასუხე, რადგან თანხის დამატებას ჭირდება კომისიის დასკვნა, კობა ხუბუნაია კი დადგენილი წესის დარღვევას მაიძულებდა. მართლაც, ბიუჯეტის არ-დამტკიცების გამო კინოცენტრის ფინანსური საქმიანობა ორი კვირის განმავლობაში იყო პარალიზებული".

ცინიზმს უწოდებს იმას, რომ წულუკიანი ამის შემდეგ "ჩაწყობის დაუშვებლობაზე საუბრობს.

• "როცა დღეს კინემატოგრაფისტები კინოცენტრის დამოუკიდებლობას მოითხოვენ, ამით მოითხოვენ სამინისტროს მხრიდან ასეთი ჩარევების აღკვეთას".
• აღნიშნავს, რომ ევროკავშირის კანონმდებლობასთან დაახლოების მიზნით საქართველოში სახელმწიფო ინსტიტუტების რეფორმებზე, წლებია, ქართველებთან ერთად, უცხოეული სპეციალისტები მუშაოებენ. მათი უპირველესი მოთხოვნა კი სსიპ-ების დამოუკიდებლობა და ავტონომიურობაა.
• "სამინისტროსა და სსიპ-ების ურთიერთობა ხელშეკრულების საფუძველზე უნდა აიგოს. მინისტრს, რომლის მმართველობის სტილი დიქტატი და უხეში ჩარევაა, მსგავსი დამოუკიდებლობა და ავტონომიურობა, რა თქმა უნდა, არ მოსწონს", — წერს ის.