რატომ არის მნიშვნელოვანი: მე-14 დღეა, რაც ჯორჯიან მანგანეზის თანამშრომლების პროტესტი მიმდინარეობს. სამუშაო პირობების გაუმჯობესების მოთხოვნით, ისინი 6 ივნისს გაიფიცნენ.

• ქუჩაში გამოსული მაღაროელები და მათი ოჯახები ღირსეულ ანაზღაურებასა და შრომის პირობების გაუმჯობესებას ითხოვენ.
• მოთხოვნების 24-პუნქტიანი სია მოიცავს გაზრდილ ანაზღაურებას, ანაზღაურებად დასვენების დღეებს და ბიულეტენს, უკეთეს კვებას, ჯანმრთელობის უფრო ყოვლისმომცველ დაზღვევაზე გადასვლას, გაუმჯობესებულ ეკოლოგიურ ვითარებას ჭიათურაში. ასევე, იმ შახტების სრულად გაიხსნას, რომელთა მუშაობა იანვარში შეიზღუდა.
• დასაქმებულების თანახმად, წლის დასაწყისიდან მშრომელების უმეტესობა სახლში გაუშვეს, ხელფასის 60% გადაუხადეს და მხოლოდ მათ გააგრძელეს მუშაობა, ვინც გვირაბების სიმტკიცეს იცავს.
• გაფიცულებმა მომპოვებელი კომპანია, ჯორჯიან მანგანეზი, მაღაროელებისთვის მანგანუმის მოპოვების კვოტების საგრძნობლად გაზრდაში დაადანაშაულეს და თქვეს, რომ ეს მათ სიცოცხლეს რისკის ქვეშ აყენებს.
• 12 ივნისს რამდენიმე მათგანმა შიმშილობა დაიწყო.
• 16 ივნისს კი ერთ-ერთმა მაღაროელმა, პროტესტის ნიშნად, პირი, ხოლო გუშინ, 18 ივნისს კიდევ ერთმა მათგანმა თვალები ამოიკერა.
• გარდა ამისა, ერთ-ერთმა დასაქმებულმა გუშინ თვითდაზიანება მიიყენა — ის საავადმყოფოში გადაიყვანეს.
• დღეს მაღაროელები ჭიათურიდან თბილისში ჩამოვიდნენ და 16:00 საათიდან პარლამენტთან აქციას მართავენ.

დეტალები: კომპანიის განცხადებით, დასაქმებულებთან, ფაქტობრივად, ყველა საკითხზე შეჯერდნენ, გარდა ხელფასებისა.

• მათი თქმით, დასაქმებულებს 20%-ის ნაცვლად, ხელფასის 5%-ით მატება შესთავაზეს, რადგან "კომპანია წლებია ზარალიანია" და ამის რესურსი არ აქვთ.
• ამბობენ, რომ სახელმწიფომ მათ კომისიის შექმნა შესთავაზა, რომელშიც დამოუკიდებელი აუდიტორიც ჩაერთვებოდა — კრიზისის შესწავლისა და მოგვარების გზებზე ისაუბრებდნენ, რაზეც კომპანიამ მზაობა გამოთქვა.
• გარდა ამისა, ჯორჯიან მანგანეზში აცხადებენ, რომ დასაქმებულებს შესთავაზეს, აუდიტის დასკვნაზე დაყრნობით, ხელფასის მატება მიბმული იყოს გარკვეულ ფინანსურ შედეგებზე.

ჯორჯიან მანგანეზის წარმომადგენელმა ბრიფინგზე თქვა ისიც, რომ მათი მიზანი ჭიათურაში სამუშაოების განახლებაა.

• "არანაირად არ აქვს კომპანიას სურვილი, რომ ყველაფერი შეჩერებული იყოს. მიუხედავად იმისა, რომ მთელი ამ წლის განმავლობაში, არსებული კრიზისის ფონზე, იძულებული ვართ, საწარმო გავაჩეროთ".
• ამბობენ, რომ ამ პერიოდის განმავლობაში დასაქმებულებს ხელფასს მაინც უხდიდნენ, რაც, მთლიანობაში, 6 მილიონ ლარზე მეტია.
• "ვცდილობთ, რომ ამ კრიზისიდან გამოვიდეთ და ამ დაძლევის გზებზე მთავარ გამოსავლად გვეჩვენება მოლაპარაკება".
• ასევე, საუბრობენ იმაზე, რომ ღია არიან დამოუკიდებელი აუდიტის ჩართვაზე და კომისიის შექმნაზე, სადაც ადგილობრივთან ერთად, ცენტრალური ხელისუფლებაც იქნება ჩართული.
• "[ასევე]მედიატორი, შრომის ინსპექტორი, დასამქებულები და დამსამხმებელი. ერთობლივად შევისწავლით, თუ რა ხდება, რამ გამოიწვია ზარალიანობა ჭიათურაში. რატომ მივედით ამ შედეგამდე, რა გამოსწორების გზებს ვთავაზობთ ჩვენ დასაქმებულებს. ერთად ვიმსჯელოთ იმისათვის, რომ განვავითაროთ და გამოვიყვანოთ კომპანია არსებული ფინანსური კრიზისიდან".
• რაც შეეხება ხელფასის 15%-იან მატებას, კომპანიაში ამბობენ:
• "ვიღაცას შეიძლება მოეჩვენოს, რომ 15%, ნუ, ახლა, რა ციფრია... რაოდენობასთან გვაქვს საქმე. ამ პერიოდში 15% ჩვენი არსებული სახელფასო ფონდიდან, დაახლოებით ეს არის 10 მილიონი დოლარის ოდენობით წლიური ხარჯი".