რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებელი, ნიკა გვარამია 2 ნოემბერს სააპელაციო სასამართლომ 3 წლითა და 6 თვით პატიმრობაში დატოვა.

  • გვარამია დამნაშავედ ცნეს უფლებამოსილების ბოროტად გამოყენებაში ე.წ. რეკლამის გაყიდვისა და ავტომანქანის საქმეებზე.
  • NGO-ების, ევროპარლამენტარების, ადგილობრივი და საერთაშორისო ორგანიზაციების განცხადებით, გვარამიას საქმე პოლიტიკურად მოტივირებულია — ისინი პრეზიდენტს მთავარი არხის დამფუძნებლის შეწყალებისკენ მოუწოდებენ.
  • გვარამიას საქმეზე უკიდურეს შეშფოთებას გამოხატავს სახალხო დამცველიც.
  • აშშ-ის საელჩო კი ამბობს, რომ გვარამიას პატიმრობა რისკის ქვეშ აყენებს ქართველი ხალხის მკაფიო არჩევანს.
  • 16 თებერვალს ნიკა გვარამიას გათავისუფლების მოძრაობა შეიქმნა.

დეტალები: პოლიტიკოსები, ჟურნალისტები, აქტივისტები და გვარამიას თავისუფლების მოძრაობის წევრები პრეზიდენტს მოუწოდებენ, შეიწყალოს მთავარი არხის დამფუძნებელი.

  • აქციის მონაწილეების თქმით, მათი მიზანია, სალომე ზურაბიშვილს ბრიუსელში გამგზავრებამდე კიდევ ერთხელ შეახსენონ, რომ გვარამიას პატიმრობა ერთ-ერთი შემაფერხებელი ფაქტორია ევროინტეგრაციის გზაზე.
  • აქცია მსვლელობა ტელევიზიის შენობიდან დაიწყო და ორბელიანების რეზიდენციასთან გრძელდება.
  • მე აქ ვარ, როგორც ადამიანი, რომელიც ვალშია ნიკა გვარამიასთან. როცა მე ციხეში ვიყავი, ის ყველაფერს აკეთებდა ჩემს გასათავისუფლებლად", — თქვა ენმ-ის წევრმა, ნიკა მელიამ.
  • ევროპული საქართველოს ლიდერის, გიგა ბოკერიას განცხადებით კი, სანამ სალომე ზურაბიშვილი შეწყალების მექანიზმს არ იყენებს, ის ქართული ოცნების მხარესაა.
  • "მას შეუძლია, გადაირჩინოს რეპუტაცია, თუ ამას გამოიყენებს. ასე დგას საკითხი", — თქვა მან.
  • "ერთადერთი გასაღები გიჭირავთ, ქალბატონო პრეზიდენტო, დროულად გამოიყენეთ", — ამ სიტყვებით კი ზურაბიშვილს ტელეწამყვანმა, ზაალ უდუმაშვილმა მიმართა.