კულტურული მემკვიდრეობის დაცვის ეროვნული სააგენტოს ცნობით, სოფ. ჩვიბიანში 22 ივნისს ჩამოშლილ სვანური კოშკს მიმდინარე წელსვე აღდგება. სააგენტოს მტკიცებით, კოშკის ნგრევის მიზეზი, წინასწარი დასკვნით, მკაცრი კლიმატური პირობებით გამოწვეული მისი ამორტიზებულობა გახდა:

"დღესვე სააგენტოს სპეციალისტები ძეგლის პირველადი დათვალიერების შედეგად ადგილზევე დაადგენენ დაზიანების ხარისხსა და გადაუდებელი სამუშაოების ნუსხას. 24 ივნისს კი სვანეთში მივლინებული საქართველოს კულტურული მემკვიდრეობის დაცვის ეროვნული სააგენტოს ინსპექტირების ჯგუფი კიდევ უფრო საფუძლიანად შეისწავლის საგვარეულო კოშკის ნგრევის მიზეზებს, განახორციელებს ჩამოშლილი ნაგებობის აზომვებსა და კოშკის რეაბილიტაციის პროექტირებისთვის სპეციალურ ანგარიშს მოამზადებს. მალევე დაიწყება გაწმენდითი სამუშაოები," - წერია სააგენტოს განცხადებაში.

კულტურული მემკვიდრეობის სააგენტოში მიაჩნიათ, რომ იქედან გამომდინარე, რომ სვანური კოშკების მნიშვნელოვან ნაწილზე სარეაბილიტაციო-სარესტავრაციო სამუშაოები დიდი ხანია არ ჩატარებულა, აღნიშნული კოშკის ნგრევის თავიდან აცილება რთული განსასაზღვრი იყო.