საპარლამენტო და საპრეზიდენტო არჩევნები 14 მაისს გაიმართება.

რატომ არის მნიშვნელოვანი: პრეზიდენტობის ორი ძირითადი კანდიდატი ქვეყანას განვითარების მკვეთრად განსხვავებულ გზებს სთავაზობს — თურქეთი ისტორიული არჩევანის წინაშე დგას.

• მოსალოდნელია, რომ არჩევნები განსაზღვრავს ქვეყნის როლს ნატოს ალიანსში, მის ურთიერთობას აშშ-სთან, ევროკავშირთან და რუსეთთან, მიგრაციის პოლიტიკას, ანკარას როლს უკრაინის ომში და სხვა მნიშვნელოვან უსაფრთხოების ასპექტებს.
• თურქეთი ნატოს თავდაცვითი ალიანსის ნაწილია, მაგრამ ერდოღანის პრეზიდენტობის დროს ქვეყანას მჭიდრო კავშირები აქვს ჩინეთთან და რუსეთთან.

• ერდოღანი თურქეთს განიხილავს, როგორც "მშვიდობისა და უსაფრთხოების კუნძულს" და შუამავალს უკრაინა-რუსეთის ომში.

• მის მთავარ ოპონენტს სურს თურქეთი ევროკავშირში გაწევრიანების პროცესს დაუბრუნოს და აშშ-თან სამხედრო კავშირები აღადგინოს.

• ქვეყანაში ეკონომიკური კრიზისია, ინფლაცია ოფიციალურად 43,68%-ია. არსებობს ვარაუდი, რომ რეალური ინფლაციის მაჩვენებელი გაცილებით მაღალია.

კანდიდატები: რეჯეფ თაიფ ერდორანი 20 წლიანი მმართველობის შემდეგ თურქეთს ექვსი მილიონი სამუშაო ადგილის შექმნას და მრავალმხრივ განვითარებას ჰპირდება.

• იგი მისი ჩამოგდების მცდელობებში დასავლეთს ადანაშაულებს.
• მის მთავარ კონკურენტს, ქემალ ქილიჩდაროღლუს, რომელსაც მხარს უჭერს ოპოზიციური სპექტრი, სურს ნატოს წევრი სახელმწიფოს პროდასავლური, დემოკრატიული განვითარება.
• ერდოღანი ავტორიტარულ რეჟიმებში გავრცელებულ ნარატივებს მიმართავს და ოპონენტებს LGBTQ+ პროპაგანდაში "ადანაშაულებს", ხოლო თავის ისლამისტურ პარტიას ოჯახური ფასეულობების ქომაგად აცხადებს.

ერდოღანი თურქეთს 2017 წლიდან ფართო საპრეზიდენტო უფლებამოსილებით მართავს, ანკარაში მდებარე უზარმაზარი სასახლიდან.

• როგორც აღმასრულებელ პრეზიდენტს, მას შეუძლია გამოაცხადოს საგანგებო მდგომარეობა და აირჩიოს ან გაათავისუფლოს საჯარო მოხელეები.
• "თუ ის გაიმარჯვებს, ბევრი არაფერი შეიცვლება", — ამბობს სელიმ კორუ, თურქული ანალიტიკური ცენტრის, Tepav წევრი.
• "მისი უფლებამოსილებები უკვე იმდენად ფართოა, რომ აღარ შეეცდება მათ შემდგომ გაფართოებას", — ამბობს ის.

ქილიჩდაროღლუ, რომელსაც მხარს უჭერს ექვსპარტიული ოპოზიციური ალიანსი, ამბობს, რომ გამარჯვების შემთხვევაში თურქეთს მშვიდობას და დემოკრატიას მოუტანს.

• 74 წლის პოლიტიკოსი, მეტსახელად "თურქი განდი", რომელიც ხელმძღვანელობს მთავარ ოპოზიციურ რესპუბლიკურ სახალხო პარტიას (CHP), ერდოღანის მთავარი კონკურენტია და წინასწარი გამოკითხვებით მას მოქმედ პრეზიდენტთან შედარებით მცირე უპირატესობა აქვს.
• ქილიჩდაროღლუ ირწმუნება, რომ მისი გამარჯვების შემთხვევაში თურქეთში საპარლამენტო მმართველობა იქნება, სადაც პარლამენტი და პრემიერმინისტრი უფლება-მოვალეობებს გაინაწილებენ.
• იგი პირობას დებს, რომ აღადგენს დამოუკიდებელ სასამართლოებს და თავისუფალ პრესას.
• "მე მოვემსახურები თურქეთის 85 მილიონი მოქალაქეს. პატივისცემას გამოვხატავ თითოეული თქვენგანის მიმართ", — აცხადებს ქილიჩდაროღლუ.