რატომ არის მნიშვნელოვანი: 4 მაისს ოპოზიციონერმა დეპუტატებმა, ხატია დეკანოიძემ და რომან გოცირიძემ ახალი პოლიტიკური ჯგუფის შექმნა დააანონსეს.

  • მოგვიანებით გოცირიძემ ჯგუფისთვის სახელის შესარჩევად დახმარება სოციალურ ქსელში ითხოვა და ევროოპტიმისტები შეარჩია.
  • თუმცა, პარლამენტის საპროცედურო საკითხთა და წესების კომიტეტმა პოლიტიკურ ჯგუფს რეგისტრაციაზე უარი უთხრა.
  • კომიტეტის თავმჯდომარემ, ირაკლი ქადაგიშვილმა თქვა, რომ ამის უფლება არ აქვთ საარჩევნო ბლოკის სიით გასულ იმ დეპუტატებს, რომელთა პარტიასაც პარლამენტში ფრაქცია აქვს შექმნილი.

დეტალები: ინფორმაციის თავისუფლების განვითარების ინსტიტუტის შეფასებით, რეგლამენტის დარღვევასთან ერთად, საკანონმდებლო ორგანოს უარი აფერხებს საპარლამენტო პლურალიზმის განვითარებასა და გაძლიერებას.

  • ორგანიზაციაში აცხადებენ, რომ რეგლამენტის არცერთი დებულება არ ზღუდავს საარჩევნო ბლოკით არჩეული პარლამენტის წევრთა მიერ პოლიტიკური ჯგუფის შექმნას.
  • "საპარლამენტო უმრავლესობის წარმომადგენელთა განმარტება, რეგლამენტის მითითებული მუხლის სტრუქტურის მცდარ ანალიზს ეფუძნება. რეგისტრაციაზე უარის თქმის მხარდამჭერებმა ვერ/არ გაიზიარეს, რომ უფლების 228 პრიმა მუხლის მე-5 პუნქტი არის უფლების შემზღუდავი ნორმა და ის ფაქტი, რომ მასში არ არის მოხსენიებული საარჩევნო ბლოკი, გამორიცხავს ამ შეზღუდვის საარჩევნო ბლოკით არჩეულ დეპუტატებზე გავრცელებას", — ვკითხულობთ განცხადებაში.
  • აქვე ნათქვამია, რომ ირღვევა ორი დეპუტატის უფლება, შექმნან პოლიტიკური ჯგუფი და ამ ფორმით მიიღონ მონაწილეობა საპარლამენტო საქმიანობაში.

არქივიდან: ხატია დეკანოიძემ და რომან გოცირიძემ ნაციონალური მოძრაობა მას შემდეგ დატოვეს, რაც პარტიის თავმჯდომარე ლევან ხაბეიშვილი გახდა.

  • დეპუტატები თანაპარტიელებთან არსებულ აზრთა სხვადასხვაობაზე საუბრობდნენ, ძირითადად კი, საპარლამენტო ბოიკოტსა და სესიებში არმონაწილეობას ეწინააღმდეგებოდნენ.