ოკუპირებულ აღმოსავლეთში მცხოვრებ უკრაინელებს აიძულებენ რუსეთის მოქალაქეობის მიღებას — წინააღმდეგ შემთხვევაში მათ დეპორტაცია ემუქრებათ.

რატომ არის მნიშვნელოვანი: ბოლო დროს უკრაინაში, ოკუპირებულ ტერიტორიებზე მცხოვრებ ხალხზე ზეწოლა მნიშვნელოვნად გაიზარდა.

  • "სამედიცინო მომსახურებაზე წვდომა და ქალაქებს შორის გადაადგილების თავისუფლება შეიზღუდება მათთვის, ვინც უარს იტყვის რუსული პასპორტების მიღებაზე", — განაცხადა ხერსონის საოლქო საბჭოს თავმჯდომარემ, იური სობოლევსკიმ.
  • ის ფიქრობს, რომ რუსები ახლა ტერორს მიმართავენ, რადგან ამ ტერიტორიებზე იმდენ ადამიანს არ სურს გახდეს რუსეთის მოქალაქე, როგორც მოსკოვი იმედოვნებდა.
  • ბრიტანეთის თავდაცვის სამინისტროს ცნობით, მოსკოვს, როგორც ჩანს, სურს დააჩქაროს ოკუპირებული ტერიტორიების რუსეთში ინტეგრაცია, რათა უკრაინაში შეჭრა წარმატებად მიყიდოს საკუთარ ხალხს, განსაკუთრებით 2024 წლის საპრეზიდენტო არჩევნების წინ.

დეტალები: ვლადიმერ პუტინმა ხელი მოაწერა განკარგულებას, რომლის თანახმად, რუსეთის მიერ ოკუპირებულ ხერსონის, ზაპორიჟჟიას, ლუგანსკის და დონეცკის ტერიტორიებზე მცხოვრებ უკრაინის მოქალაქეებს, რომლებსაც სურთ უკრაინის მოქალაქეობის შენარჩუნება, შეუძლიათ იქ დარჩენა მხოლოდ 2024 წლის 1 ივლისამდე.

  • შემდეგ კი, ოკუპირებულ რეგიონებში მცხოვრებ რუსეთის მოქალაქეობის არმქონე პირებს დეპორტაცია ემუქრებათ.
  • "ისინი [რუსები] რადიკალურად მოითხოვენ, რომ უკრაინელებმა ან უარი თქვან უკრაინულ პასპორტზე, ან მათ დაუყოვნებლივ ჩამოერთმევათ ქონება და ტერიტორიიდან გადასახლდებიან", — აცხადებენ უკრაინელი სამხედროები.
  • კიევი არაერთგვაროვან სიგნალებს აგზავნის იმის შესახებ, თუ რა უნდა გააკეთონ უკრაინის მოქალაქეებმა.

გერმანული გამოცემა, DW, ესაუბრა ადამიანებს ხერსონისა და ზაპორიჟჟიის ოკუპირებული ტერიტორიებიდან, რომლებმაც დაადასტურეს, რომ უკრაინელებს რუსული პასპორტების აღებას აიძულებენ.

  • უსაფრთხოების მიზნით, არცერთ პირს არ სურს ვინაობის გამჟღავნება.
  • "რუსმა ჯარისკაცებმა ჩვენს სახლში ყველაფერი გაჩხრიკეს. უკრაინული პასპორტი რომ ვაჩვენე, დამიყვირეს, რუსულით უნდა გამოვცვალო, თორემ მანქანას წაიყვანენ და დეპორტირებულნი ვიქნები", — ამბობს ხერსონის მახლობლად მცხოვრები კაცი.