აშშ-ის პრეზიდენტი დონალდ ტრამპი მიიჩნევს, რომ უკრაინის პრეზიდენტი ვოლოდიმირ ზელენსკი მზადაა რუსეთთან სამშვიდობო შეთანხმების დასადებად, რომელიც ყირიმის ნახევარკუნძულის დათმობას მოიცავს. Sky News-ის ცნობით, ტრამპმა განაცხადა, რომ ვატიკანში შეხვედრის დროს მხარეებმა ოკუპირებული ნახევარკუნძულის საკითხის განხილვა მოახერხეს.

გამოცემა წერს, რომ ტრამპის აზრით, ზელენსკი მზადაა ყირიმი დათმოს — "ვნახოთ, რა მოხდება უახლოეს დღეებში", შემდეგ კი დასძინა: "[მე] ნუ მელაპარაკებით ყირიმზე, ესაუბრეთ ობამას და ბაიდენს ყირიმზე".

აშშ-ის პრეზიდენტმა დონალდ ტრამპმა ვატიკანში უკრაინელ კოლეგასთან, ვოლოდიმირ ზელენსკისთან შეხვედრას, რომელიც რომის პაპ ფრანცისკეს დაკრძალვის ცერემონიაზე გაიმართა, "შესანიშნავი" უწოდა.

როგორც უკრაინული მედია წერს, ამის შესახებ მან ჟურნალისტებს საპრეზიდენტო თვითმფრინავში ასვლამდე განუცხადა.

ტრამპმა განაცხადა, რომ ზელენსკისთან შეხვედრამ "კარგად ჩაიარა".

"კარგი შეხვედრა გვქონდა. ეს შესანიშნავი შეხვედრა იყო... ეს ყველაზე შესანიშნავი კაბინეტია, რაც კი ოდესმე მინახავს... მას [ზელენსკის] სურს, რომ თავისი ქვეყნისთვის რაიმე კარგი გააკეთოს. ვფიქრობ, ის კარგ საქმეს აკეთებს და ბევრს შრომობს", — აღნიშნა მან.

ამერიკის პრეზიდენტის თქმით, ზელენსკიმ შეხვედრის დროს განაცხადა, რომ "მას მეტი იარაღი სჭირდება".

"მაგრამ ის ამას სამი წელია ამბობს... ახლა მინდა ვნახო, რა მოხდება რუსეთთან დაკავშირებით. რადგან გაკვირვებული და იმედგაცრუებული ვიყავი რუსეთით. ძალიან იმედგაცრუებული ვარ, რომ მათ ეს ადგილები დაბომბეს", — თქვა ტრამპმა.

ტრამპმა ასევე აღნიშნა, რომ მისი ურთიერთობა ზელენსკისთან "არასდროს ყოფილა ცუდი"“ და თებერვლის ბოლოს ოვალურ კაბინეტში არსებული სიტუაცია "პატარა კამათი" იყო.

ამერიკის პრეზიდენტის თქმით, ხედავს, რომ ზელენსკი ახლა "უფრო დამშვიდდა", "ესმის სურათი" და "სურს შეთანხმების დადება".

შეგახსენებთ, რომ 26 აპრილს უკრაინის პრეზიდენტი ვოლოდიმირ ზელენსკი და აშშ-ის პრეზიდენტი დონალდ ტრამპი, რომის პაპ ფრანცისკეს დაკრძალვამდე, ვატიკანში შეხვდნენ. უკანასკნელი პატივის მისაგებად.

ზელენსკიმ განაცხადა, რომ ტრამპთან მის შეხვედრას ისტორიული პოტენციალი აქვს. თეთრმა სახლმა შეხვედრას ძალიან პროდუქტიული უწოდა.

იმავე დღეს, ტრამპმა გააკრიტიკა რუსეთის მიერ უკრაინის ქალაქებზე განხორციელებული ბოლო დარტყმები და გამოთქვა ეჭვი — უნდა თუ არა ვლადიმერ პუტინს ომის დასრულება სურს, რის გამოც რუსეთს სანქციებით დაემუქრა.