ამის შესახებ კოალიცია ინფორმაციის სანდოობისთვის განცხადებას ავრცელებს.

რატომ არის მნიშვნელოვანი: Facebook-მა მთავრობის სტრატეგიული კომუნიკაციების დეპარტამენტთან დაკავშირებული 80 ყალბი ანგარიში, 26 გვერდი, 9 ჯგუფი და 2 Instagram ანგარიში კოორდინირებული არაავთენტური ქცევის გამო წაშალა.

  • Facebook-ის თანახმად, ყალბი ანგარიშების გამოყენებით პროსამთავრობო ნარატივის პოპულარიზებასა და ოპოზიციის დისკრედიტაციას ცდილობდნენ.
  • ანგარიშში ვკითხულობთ, რომ ქსელი 24 საათის განმავლობაში ფუნქციონირებდა, რათა მთავრობის მხარდასაჭერი კონტენტი გაევრცელებინა, მათ შორის, ოფიციალური სამთავრობო გვერდებისა და პროსამთავრობო მედიების პოსტების გაზიარებით.
  • "მიუხედავად იმისა, რომ ამ ოპერაციის მიღმა მყოფი ადამიანები ცდილობდნენ, დაემალათ თავიანთი ვინაობა და კოორდინაცია, ჩვენმა გამოძიებამ იპოვა კავშირი მთავრობის სტრატეგიული კომუნიკაციების დეპარტამენტთან", — ვკითხულობთ ანგარიშში.
  • Facebook-ის მონაცემებით, ყალბი ანგარიშებიდან კონტენტის რეკლამირებაში, დაახლოებით, 33 500 დოლარი დაიხარჯა.

დეტალები: კოალიციის განცხადებით, შემაშფოთებელია, რომ მთავრობის სტრატკომი, დეკლარირებული მიზნების საწინააღმდეგოდ, მოქალაქეების შეცდომაში შეყვანის ფარულ ოპერაციებშია ჩართული.

  • მათივე თქმით, დეზინფორმაციული ქსელებისგან მომდინარე ზიანის შესამცირებლად მნიშვნელოვანია, პარლამენტმა მის ხელთ არსებული საზედამხედველო მექანიზმები გამოიყენოს.
  • "მათ შორის, შექმნას დროებითი საგამოძიებო კომისია ან/და მიმართოს სახელმწიფო აუდიტის სამსახურს".

განცხადებას ხელს აწერენ: ევროპულ ქართული ინსტიტუტი — EGI;

  • დემოკრატიის კვლევის ინსტიტუტი — DRI;
  • მმართველობის მონიტორინგის ცენტრი — GMC;
  • სამართლიანი არჩევნებისა და დემოკრატიის საერთაშორისო საზოგადოება — ISFED;
  • ინფორმაციის თავისუფლების განვითარების ინსტიტუტი — IDFI;
  • ღია სივრცე კავკასია — COS;
  • საქართველოს ჟურნალისტური ეთიკის ქარტია;
  • ფრანკლინის კლუბი;
  • ტოლერანტობის და მრავალფეროვნების ინსტიტუტი (TDI);
  • საქართველოს რეფორმების ასოციაცია (GRASS);
  • IWPR საქართველო;
  • აი, ფაქტი — Ifact.