სამხედრო წვრთნები, სახელად მცველი 23 აშშ-ის შეიარაღებული ძალების ორგანიზებულია და ის 2021 წლიდან ყოველწლიურად 22 აპრილიდან 23 ივნისამდე ტარდება.

რატომ არის მნიშვნელოვანი: პენტაგონის განმარტებით, წვრთნები აშშ-ში განთავსებული ძალების სტრატეგიულ განლაგებაზე, არმიის მარაგების გამოყენებასა და ევროპელ მოკავშირეებთან და პარტნიორებთან თავსებადობის გაზრდაზეა ფოკუსირებული.

• 5 აპრილს გამართულ ბრიფინგზე პენტაგონის წარმომადგენელმა განაცხადა, რომ სწავლებაში მონაწილეობას დაახლოებით 9 ათასი ამერიკელი, ხოლო 26 პარტნიორი და მოკავშირე ქვეყნიდან 17 ათასი სამხედრო მიიღებს.
• მისივე ინფორმაციით, წვრთნები 10 სხვადასხვა ევროპული ქვეყნის ტერიტორიაზე ჩატარდება.
• "წვრთნები შექმნილია იმის დემონსტრირებისთვის, რომ აშშ-ის არმიას შეუძლია, სწრაფად განათავსოს საბრძოლო ჯარები და აღჭურვილობა, რათა მხარი დაუჭიროს მოკავშირეებს, შეაჩეროს ისინი, ვინც საფრთეს უქმნის ევროპის მშვიდობას და დაიცვას კონტინენტი აგრესიისგან".
• პენტაგონმა, ასევე, განაცხადა, რომ წვრთნები აჩვენებს ევროპელი ქვეყნების მონდომებას, გაზარდონ თავისი სამხედრო ძალების მასშტაბები, შესაძლებელობები და ურთიერთავსებადობა.

დეტალები: 28 აპრილს აქცენტმა გაავრცელა ინფორმაცია, რომ საქართველომ სამხედრო წვრთნებში მონაწილეობა გადაიფიქრა.

• როგორც გამოცემა წერდა, ევროპასა და აფრიკაში აშშ-ის არმიის პრესსამსახურში განუცხადეს, რომ "სამხედრო წვრთნები დინამიური და ხშირად მოძრავი მოვლენაა და ქვეყნები, რომელთა მონაწილეობა მოსალოდნელია, შეიძლება შეიცვალოს ნებისმიერი მიზეზი გამო".
• პენტაგონის საიტზე წვრთნებში მონაწილე ქვეყნების სია აღარ იძებნება — ნათქვამია, რომ მასალა რედაქტირებულია, რისთვისაც ბოდიშს იხდიან, თუმცა მიზეზი დაკონკრეტებული არ არის.

რას ამბობს ხელისუფლება: 30 აპრილს თავდაცვის მინისტრმა ქართული შეიარაღებული ძალების დღესთან დაკავშირებულ ღონისძიებაზე ჟურნალისტებთან საუბრისას სწავლებაში საქართველოს არმონაწილეობა ხარჯებით ახსნა.

• როგორც ჯუანშერ ბურჭულაძემ თქვა, საქართველო წელს 20 საერთაშორისო სწავლებაში მონაწილეობს, გასულ წელს კი 6 საერთაშორისო სწავლებას უმასპინძლეს, "ასე რომ, ამით სპეკულირებას პერსპექტივა არა აქვს".

გამოხმაურება: დღეს პლენარულ სხდომაზე სტრატეგია აღმაშენებლის დეპუტატმა, თეონა აქუბარდიამ თავდაცვის მინისტრს, ჯუანშერ ბურჭულაძეს სადეპუტატო კითხვით მიმართა.

• მისი თქმით, სამხედრო სწავლებაში არმონაწილეობით თავდაცვის სამინისტრომ კრემლს გაუგონარი საჩუქარი მიართვა.
• დეპუტატი ამბობს, საქართველო წლებია მონაწილეობს წვრთნებში და სიცრუეა, როდესაც თავდაცვის უწყება სწავლებაზე მონაწილეობაზე უარის მიზეზად ლოჯისტიკური ხარჯებს ასახელებს.
• "სამხედრო სწავლებაში არმონაწილეობა არის მკაფიო სიგნალი ნატოსგან დისტანცირების, დასავლეთისგან დისტანცირების და იმის, რომ საქართველოსთვის აღარ არის დეკლარირებული ეროვნული ინტერესი ნატო-ში გაწევრიანება ისევე როგორც ტერიტორიული მთლიანობის და სუვერენიტეტის უზრუნველყოფა".