ამის შესახებ საქართველოს რეგიონული განვითარებისა და ინფრასტრუქტურის მინისტრმა, ირაკლი ქარსელაძემ ჟურნალისტებთან ისაუბრა.

რატომ არის მნიშვნელოვანი: რიკოთის მონაკვეთზე მოძრაობა 30 მარტს შეწყდა და ავტომობილების გადაადგილება დაიწყო გომი-საჩხერე-ჭიათურა-ზესტაფონის გზაზე.

  • საავტომობილო გზების დეპარტამენტის ინფორმაციით, აღნიშნული გარემოება გამოწვეული იყო უკიდურესი აუცილებლობიდან, ვინაიდან თოვლის დნობის შედეგად, გზასთან სიახლოვეს, დაახლოებით 200 მეტრში, განვითარდა მეწყრული პროცესები.
  • ამბობდნენ, კვირის ბოლოსათვის უკვე ცნობილი იქნებოდა პირველადი, წინასწარი შედეგები, რომლითაც იმსჯელებდნენ როგორც საფრთხეების დონეზე, ასევე ავტოსატრანსპორტო საშუალებების მოძრაობის აღდგენის შესაძლებლობაზე.
  • 8 აპრილს დეპარტამენტმა რიკოთზე ტრანსპორტის მოძრაობა სპეციალური რეჟიმით აღადგინა.
  • თუმცა 11 აპრილს დროებით ისევ აკრძალა ქვათაცვენის გამო.

დეტალები: მინისტრის თქმით, მიმდინარეობს კვლევა-ძიების სამუშაოები და რიკოთის 149-ე კილომეტრზე მობილიზებულია ყველა შესაბამისი სამსახური, რომ საბოლოო საინჟინრო მოწყობის სამუშაოები ჩატარდეს.

  • მისივე თქმით, აქვთ მოლოდინი, რომ მალე ექნებათ პროექტი და რაც შეიძლება მალე შეძლებენ პრობლემის მოგვარებასა და სპეციალური რეჟიმის გარეშე მოძრაობის აღდგენას.
  • "მანამდე კი, ნებისმიერი ჩაკეტვა-გახსნა ან გადართვა დაფუძნებული იქნება გონივრულ და ექსპერტულ დასკვნებზე. გვაქვს ამოცანა, რომ ზაფხულის სეზონამდე შევძლოთ ყველა იმ სამუშაოს გატარება, რაც საჭირო იქნება გადაადგილების სპეციალური რეჟიმის მოსახსნელად", — თქვა ქარსელაძემ.
  • ამბობს, რომ სამტრედია-გრიგოლეთის მონაკვეთზე მშენებარე ხიდის დაზიანებასთან დაკავშირებით საჭიროა კვლევითი სამუშაოების ჩატარება და საექსპერტო ორგანიზაცია მაქსიმალურს აკეთებს პროცესის დროულად დასასრულებლად.