12 არასამთავრობო ორგანიზაცია მიიჩნევს, რომ მმართველი პარტიის - ქართული ოცნების გადაწყვეტილება პარლამენტის წევრების სრულად პროპორციული წესით არჩევის გადავადების შესახებ მიუღებელი და გაუმართლებელია. ამ შინაარსის განცხადება არასამთავრობო ორგანიზაციებმა ერთად გაავრცელეს.

"მმართველი პარტიის მიერ მოყვანილი არგუმენტი, პარტიის შიგნით აზრთა სხვადასხვაობის შესახებ, რამაც აღნიშნული გადაწყვეტილების მიღება გამოიწვია, დაუსაბუთებელი და არადამაჯერებელია. რჩება შთაბეჭდილება, რომ შერეული სისტემის შენარჩუნებით, მმართველი გუნდი ცდილობს შეიქმნას გარანტიები, რომელიც ხელს შეუწყობს უპირატესობის მოპოვებაში 2020 წლის არჩევნებზე," - აღნიშნულია განცხადებაში.

არასამთავრობო ორგანიზაციებს მიაჩნიათ, რომ პარლამენტის სრულად პროპორციული წესით დაკომპლექტების წესის გადავადების შემთხვევაში, ცვლილებები იქნება არა კონსენსუსის და ფართო საზოგადოების შეთანხმების საგანი, არამედ ერთი პარტიის მიერ დახურულ კარს მიღმა მიღებული გადაწყვეტილების შედეგი. განცხადების ავტორები, რომ პროპორციულ სისტემაზე გადასვლა უნდა მოხდეს დაუყოვნებლივ, ყოველგვარი გადავადების გარეშე, ვენეციის კომისიის რეკომენდაციების გათვალისწინებით.

"სამწუხაროდ, ასეთი მიდგომა სერიოზული კითხვის ნიშნის ქვეშ აყენებს არასამთავრობო სექტორის და სხვა დაინტერესებული მხარეების სამომავლო თანამშრომლობას უმრავლესობასთან ამ თუ სხვა საკითხებთან დაკავშირებით, რადგან იქმნება შთაბეჭდილება, რომ სამოქალაქო საზოგადოების ჩართულობა მოჩვენებითია და თანამშრომლობის კონსტრუქციული ფორმატების მიუხედავად, არსებითი ცვლილებების მიღწევა ვერ ხერხდება," - აღნიშნავენ არასამთავრობო ორგანიზაციები.

ისინი ქართულ ოცნებას მოუწოდებენ ვენეციის კომისიისა და არასამთავრობო ორგანიზაციების რეკომენდაციები გაითვალისწინონ და საარჩევნო სისტემასთან დაკავშირებული გადაწყვეტილებები მიიღოს კონსესუსის შედეგად და აუჩქარებლად, რათა საკონსტიტუციო ცვლილებები არ ტოვებდეს ერთი პარტიის ინტერესებზე მორგებულის შთაბეჭდილებას.

განცხადებას ავრცელებენ შემდეგი არასამთავრობო ორგანიზაციები:

1. სამართლიანი არჩევნებისა და დემოკრატიის საერთაშორისო საზოგადოება;

2. საერთაშორისო გამჭვირვალობა - საქართველო;

3. ფონდი ღია საზოგადოება საქართველო;

4. საქართველოს ახალგაზრდა იურისტთა ასოციაცია;

5. ლიბერალური აკადემია;

6. სამოქალაქო განვითარების სააგენტო;

7. ადამიანის უფლებათა ცენტრი;

8. ინფორმაციის თავისუფლების განვითარების ინსტიტუტი;

9. მედიის განვითარების ცენტრი;

10. საქართველოს რეფორმების ასოციაცია;

11. კონსტიტუციის 42-ე მუხლი;

12. ეკონომიკური პოლიტიკის კვლევის ცენტრი.