საზოგადოებრივი მაუწყებლის თანამშრომელს, დოდო შონავას არხზე მიმდინარე და ახალი ამბების ბლოკში კონსულტანტის თანამდებობა შესთავაზეს, თუმცა, უარს ამბობს. შრონავა ამ ეტაპზე საზოგადოებრივი მაუწყებლის საზოგადოებრივ-პოლიტიკური მიმართულების ხელმძღვანელია.

"კონსულტანტი, მრჩეველი მიუღებელი პოზიციებია ჩემი კომპენტენციის ადამიანისთვის, როგორც პოზიცია, თორემ, როგორც უფლება-მოვალეობა, მე მრჩეველიც კარგი ვარ, კონსულტანტიც კარგი ვარ, ექსპერტიც კარგი ვარ და მედია-მენეჯერიც არ ვარ ურიგო," - განმარტავს On.ge-სთან საუბრისას შონავა უარის თქმის მიზეზს.

შონავას თქმით, მენეჯმენტისგან ჯერ მხოლოდ სიტყვიერი შეთავაზება მიიღო, თუმცა, დათანხმებას არ აპირებს. როგორც ის ამბობს, მან არ იცის, რა იქნება მისი უშუალო ფუნქცია და განმარტავს, რომ დღევანდელი მდგომარეობით, კონსულტანტის თანამდებობა მაუწყებლისა და ნიუსრუმის სტრუქტურაში არაა გათვალისწინებული. ის აღნიშნავს, რომ ის წესით, ე.წ. დამგეგმავი მაგიდის წევრი უნდა იყოს.

"ის [ე.წ. დამგეგმავი მაგიდა] დაკომპლექტდა თურმე, როგორც მითხრეს. აქედან გამომდინარე, ეს არის შრომითი კანონმდებლობის დარღვევა, რადგან მე მუდმივ შტატზე ვარ მე არანაკლები თანამდებობა და ფინანსური ანაზღაურება უნდა შემომთავაზონ," - ამბობს შონავა და დასძენს, რომ მისი დღევანდელი მოვალეობით, საზოგადოებრივ-პოლიტიკური გადაცემებისთვის კონსულტაციების გაწევა იყო.

მისი თქმით, ტელევიზიაში კონსულტანტის თანამდებობა ან დროებით უნდა იყოს, ან არ უნდა არსებობდეს. მისი აზრით, ხელმძღვანელს, თავისი კვალიფიკაციიდან გამომდინარე, კონსულტანტი არ უნდა სჭირდებოდეს.

"კონსულტაცია უნდა შედიოდეს ყველა მენეჯერის უფლება-მოვალეობაში. ჩვენ უნდა ვიყოთ ისეთი კვალიფიკაციის პროფესიონალები, რომლებიც ყოველთვის გაუწევენ კონსულტაციას - მათ დაქვემდებარებულ ადამიანებს და გადაცემებსაც. მიმაჩნია, რომ ეს უნდა იყოს უფლება-მოვალეობრივი და არა - პოზიციური დაფიქსირება," - ამბობს შონავა.

საზოგადოებრივი მაუწყებლის მიმდინარე და ახალი ამბების ბლოკის დირექტორი, გიორგი გვიმრაძე On.ge-სთან საუბარში აღნიშნავს, რომ სტრუქტურის მიხდვით, შონავას დღევანდელი პოზიცია მიმდინარე წლის 17 ივლისიდან უქმდება.

"[ახალი პოზიცია] იმიტომ შევთავაზეთ მისი გამოცდილების და კომპეტენციის დაკარგვა რომ არ გვინდოდა," - განმარტავს გვიმრაძე შონავასთვის ახალი თანამდებობის შეთავაზების მიზეზებს.