საქართველოს პარლამენტის იურიდიულ საქმეთა კომიტეტმა დეოლიგარქიზაციის შესახებ კანონის პროექტის კორექტირებული ვერსია განიხილა.

რატომ არის მნიშვნელოვანი: იურიდიულ საკითხთა კომიტეტმა დეოლიგარქიზაციის შესახებ კანონის პროექტის კორექტირებულ ვარიანტს ხმათა უმრავლესობით მხარი დაუჭირა.

  • კანონპროექტში ვენეციის კომისიის რეკომენდაციის მიხედვით ცვლილებები შევიდა.
  • იურიდიულ საკითხთა კომიტეტის თავმჯდომარის ინფორმაციით, კორექტირებული კანონპროექტი პლენარულ სხდომაზე გატანამდე ვენეციის კომისიას განსახილველად კვლავ გადაეგზავნება.

დეტალები: მთავრობის ნაცვლად პირის ოლიგარქად ცნობის საკითხს ანტიკორუფციული ბიურო გადაწყვეტს.

  • ანტიკორუფციული ბიურო პირის ოლიგარქად ცნობის პროცედურას იწყებს საკუთარი ინიციატივით, ან მთავრობის წევრის, ეროვნული უსაფრთხოების საბჭოს მუდმივი წევრის, ეროვნული ბანკის, სახელმწიფო უსაფრთხოების სამსახურის ან კომუნიკაციების ეროვნული კომისიის მიმართვის საფუძველზე.
  • იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა, რომ უფლების დელეგირების მიზეზია, პირის ოლიგარქად ცნობა მაქსიმალურად დისტანცირდეს პოლიტიკისგან.

  • ანტიკორუფციული ბიუროს მიერ ოლიგარქად ცნობილ პირებს პოლიტიკური პარტიების და დემონსტრაციების დაფინანსება აღარ აეკრძალებათ.

  • ოლიგარქად რეგისტრირებული პირები ვერ შეძლებენ პრივატიზაციის პროცესში მონაწილეობას.

  • ანტიკორუფციული ბიუროს გადაწყვეტილება პირის ოლიგარქად ცნობის ან არცნობის შესახებ დაექვემდებარება სასამართლოს კონტროლს, ხოლო პირის მიმართ გადაწყვეტილება ოლიგარქად ცნობის შესახებ ძალაში არ შევა, ვიდრე არ დასრულდება სამართალწარმოება.