სახალხო დამცველმა, ლევან იოსელიანმა დღეს ახალი მოადგილეები წარადგინა. ელენე ღუდუშაურმა და ნათია ჯულაყიძემ ამ პოსტზე გიორგი ბურჯანაძე და ეკატერინე სხილაძე შეცვალეს.

რატომ არის მნიშვნელოვანი: ნათია ჯულაყიძე პარტია მოქალაქეების ლიდერის, ალეკო ელისაშვილის დისშვილია და პარტია მოქალაქეების შემწირველია.

• ალეკო ელისაშვილმა პარტია მოქალაქეები ლევან იოსელიანთან ერთად დააფუძნა — ისინი თანაპარტიელები იყვნენ.

დეტალები: ჯულაყიძე პარტია მოქალაქეებსა და არასამთავრობო ორგანიზაცია სამოქალაქო მოძრაობაში მუშაობდა.

• როგორც On.ge-სთან ამბობს, მოადგილედ დანიშვნის გადაწყვეტილება ლევან იოსელიანს ეკუთვნის, მიზეზად კი ერთად მუშაობის გამოცდილებას ასახელებს.
• კითხვაზე, ხედავს თუ არა პრობლემას, რომ ის ელისაშვილის ნათესავია, ამბობს, რომ ვერა — "მე შემოთავაზება სახალხო დამცველისგან მივიღე, რომელიც არის იოსელიანი, რომელთანაც არანაირი ნათესაური კავშირი არ მაქვს".
• "მხოლოდ სამსახურებრივად ვიკვეთებოდით წლების განმავლობაში. ლევანს რომ ჰქონდეს რაიმე ნათესაური კავშირი, რა თქმა უნდა, ეს ძალიან დიდი პრობლემა იქნებოდა, მაგრამ ის, რომ ახლა მე ნათესაური კავშირი მაქვს მოქმედ დეპუტატთან, არანაირი".

გარდა ამისა, ჯულაყიძეს ვკითხეთ, როგორ შეაფასებს ალეკო ელისაშვილის განცხადებებს, თუკი ის დისკრიმინაციული იქნება.

• "თუკი რაიმე დისკრიმინაციულ ხასიათის განცხადება იქნება, დიდი იმედი მაქვს, რომ არ იქნება, მაგრამ თუ იქნება, ერთ-ერთი პირველი ვიქნები, ვინც კრიტიკულად შეაფასებს ამ განცხადებას";
• "კიდევ უფრო უახლოესი ადამიანები რომ იყვნენ, დამერწმუნეთ, რომ ერთ-ერთი პირველი ვიქნები, ვინც ამაზე ძალიან კრიტიკულ განცხადებებს გააკეთებს. ამის ნამდვილად არ მეშინია, ძალიან დარწმუნებული ვარ ჩემს თავში", — გვეუბნება ის.

ნათია ჯულაყიძე პარტია მოქალაქეების შემწირველია — ჯამში ეს თანხა 16 000-ია.

• ხოლო 2017 წელს მან მერობის დამოუკიდებელ კანდიდატს ალეკო ელისაშვილს, 700 ლარი შესწირა.
• ჯულაყიძე ამ თემაზე გვეუბნება, რომ ისევე როგორც პარტიის ყველა წევრი, თვითონაც იყო შემომწირველი — "ძალიან ჩვეულებრივი ამბავია".
• მისივე განცხადებით, 2020 წელს საკმარისი შემოსავალი ჰქონდა, რომ მსგავსი ფინანსური დახმარება გაეწია პარტიისთვის.

ომბუდსმენის აპარატში ის რამდენიმე დეპარტამენტს გაუწევს კოორდინაციასა და ზედამხედველობას, მათ შორის, ბავშვის უფლებათა, შეზღუდული შესაძლებლობის მქონე პირთა უფლებების, გენდერის და თანასწორობის.

• გვეუბნება, რომ იმავე თემებზე მოუწევს მუშაობა, რაზეც აქამდეც უმუშავია განსხვავებული ფორმით.

ბიოგრაფია: ის 1996 წლის 30 მაისს დაიბადა. რას შეეხება განათლებას:

• 2014–2018 — თბილისის სახელმწიფო უნივერსიტეტის პოლიტიკის მეცნიერების ბაკალავრი;

• 2018–2019 — საფრანგეთის ლილის კათოლიკური უნივერსიტეტის ევროპის პოლიტიკური და სოციალური მეცნიერებების ფაკულტეტის სამაგისტრო პროგრამა;

• 2019–2020 — ნიდერლანდების სამეფოს გრონინგენის უნივერსიტეტი, გაცვლითი პროგრამა, სოციალური და საერთაშორისო საკითხების სამაგისტრო პროგრამა;

• 2018–2021 — თბილისის სახელმწიფო უნივერსიტეტის სახელმწიფო მართვისა და საჯარო ადმინისტრირების მაგისტრი.

სამუშაო გამოცდილება: 2023 წლის 3 მარტიდან — საქართველოს სახალხო დამცველის მოადგილე.

• 2021-2023 წლებში — საქართველოს პარლამენტის ვიცე სპიკერის აპარატის უფროსი სპეციალისტი;
• 2020-2021 — საქართველოს სამოქალაქო მოძრაობის აღმასრულებელი დირექტორი;
• 2018–2020 — ევროპის დემოკრატიის ფონდის (EED) პროექტის პროგრამის — საქართველოს სამოქალაქო მოძრაობის მთავარი ოფიცერი;
• 2019–2020 — აშშ-ის დემოკრატიის ეროვნული ფონდის (NED) პროექტის პროგრამის საქართველოს სამოქალაქო მოძრაობის მთავარი ოფიცერი;
• 2020 წელს — ევროპის დემოკრატიული ფონდის პროექტი – სამოქალაქო მედიის რეპორტერი.