ამის შესახებ მართლმადიდებელი ეკლესიის ოფიციალურ განცხადებაში ვკითხულობთ.

რატომ არის მნიშვნელოვანი: 14 მარტს, პარლამენტთან ზურაბ მახარაძემ და სხვა პრორუსმა მოძალადეებმა ევროკავშირის დროშა ჩამოხსნეს, დაგლიჯეს და დაწვეს — აქციაში მონაწილეობდა სასულიერო პირიც.

  • სასულიერო პირები ჩანდნენ რუსული კანონის საწინააღმდეგო აქციებზეც, რომლებიც სამართალდამცველებმა წყლის ჭავლისა და ცრემლსადენი გაზის გამოყენებით რამდენჯერმე დაშალეს, მოგვიანებით კი დაარბიეს.
  • საპატრიარქომ ისინი ერთ განცხადებაში გააკრიტიკა და "რადიკალური და საზოგადოებაში პოლარიზაციის ხელშემწყობი პოზიციების" საჯაროდ დაფიქსირებისაგან თავშეკავებისკენ მოუწოდა.

დეტალები: საპატრიარქოს თქმით, გუშინდელ აქციაზე სასულიერო პირი თვითნებურად მოქმედებდა.

  • "მეტიც, ის მოქმედებდა საეკლესიო კანონიკის დარღვევით და მისი მოწოდებები საზოგადოების პოლარიზაციას უწყობდა ხელს", — ნათქვამია განცხადებაში.
  • აქვე ვკითხულობთ, რომ მღვდელმთავარს რეაგირებისათვის შესაბამისი წერილი გაეგზავნება.
  • "მიუღებელია ის, რაც გუშინ ვიხილეთ, როდესაც აქციაზე ლოცვასთან ერთად ისმოდა მოქალაქეებისადმი მუქარა. საეკლესიო ეთიკისთვის შეუფერებელია მლოცველი ადამიანისაგან შეურაცხმყოფელი მიმართვები, გინება და, მით უფრო, ქვების სროლა".

საპატრიარქო აკრიტიკებს 7-8 მარტის აქციებსაც.

  • "ქვეყნისათვის რაიმე სიკეთის მოტანა სრულიად წარმოუდგენელია მოლოტოვის კოქტეილების საშუალებით, სამართალდამცავებისათვის ცეცხლის წაკიდებისა და პარლამენტის შენობაში ხანძრის გაჩენის მცდელობით, ეს სრულიად მიუღებელია".