ორგანიზაცია რუსული კანონის გარშემო მიმდინარე მოვლენებს ეხმაურება და საწოგადოებისა და მედიის წინააღმდეგ ხელისუფლების განცხადებებზე საუბრობს.

რატომ არის მნიშვნელოვანი: მას შემდეგ, რაც რუსული კანონის საწინააღმდეგო აქცია ჯერ დაშალეს, შემდეგ კი დაარბიეს, უმრავლესობას კანონის უკან გამოწვევა მოუწია, თუმცა მმართველ გუნდში მაშინვე დაიწყეს კანონის მოწინააღმდეგეთა მიმართ მადისკრეტირებელი კამპანია.

• 12 მარტს, იმედის ეთერში ირაკლი ღარიბაშვილმა თქვა, რომ ფრანკლინის კლუბში, რომელიც საქართველოს უნივერსიტეტშია შექმნილი, ახალგაზრდებს "წამლავენ" და "ტვინს ურეცხავენ".
• ისაუბრა იმაზე, რომ თითქოს ისინი ანარქისტები არიან და სატანისტების ფორმები ეცვათ.
• ამ განცხადებებს შეუერთდნენ მმართველი გუნდის სხვა წევრებიც — მათ შორის "ოცნების" თავმჯდომარე, ირაკლი ჯობახიძე.

TDI-ის შეფასებით, ხელისუფლება მიზანმიმართულად სპეკულირებს მართლმადიდებელი ეკლესიითა და საზოგადოებაში მისი ავტორიტეტით.

• ასევე, დაუფარავად აწარმოებს ანტიდასავლულრ პოლიტიკას, უპირისპირდება საქართველოს კონსტიტუციით გაცხადებულ მიზნებს, ადამიანის უფლებებსა და ქვეყნის დემოკრატიულ განვითარებას.
• "კანონის მიღების მიზანი შეიძლება შეფასდეს, როგორც კრიტიკული მედიისა და სამოქალაქო ორგანიზაციების რეპრესიებისა და გაქრობის გზით, საქართველოს ევროატლანტიკურ სტრუქტურებში ინტეგრაციის დაბრკოლების, ქვეყნის იზოლაციაში მოქცევისა და საბოლოოდ რუსული რეჟიმის დამყარების მცდელობა".

დეტალები: ორგანიზაცია მიუთითებს, რომ მას შემდეგ, რაც უმრავლესობას კანონპროექტის გაწვევა მოუწია, ხელისუფლების და მასთან დაკავშირებული კრემლისტური ჯგუფების ანტილიბერალური და ანტიდასავლური რიტორიკა კიდევ უფრო ძლიერდება.

• "ხელისუფლება სამოქალაქო სექტორსა და თავისუფალ მედიას აგენტებად აცხადებს, აკნინებს მათ როლს დემოკრატიული ინსტიტუტების განვითარებაში და ანტისახელმწიფოებრივ, ანტიეროვნულ საქმიანობაში ადანაშაულებს".
• "ეს განცხადებები ასევე თანხვედრაშია კრემლის პროპაგანდისტულ გზავნილებთან და რუსეთში წლების განმავლობაში თავისუფალი სამოქალაქო საზოგადოებისა და მედიის დევნასთან, რაც საბოლოოდ მათი გაქრობით დასრულდა".
• TDI ხელისუფლების პროპაგანდისტული რიტორიკის რამდენიმე მაგალითზე საუბრობს და ერთ-ერთად 12 მარტს ღარიბაშვილის ინტერვიუს ასახელებს, სადაც პრემიერმინისტრმა სამოქალაქო სექტორი შუღლის გაღვივებაში დაადანაშაულა.
• ამასთან, ორგანიზაცია მიუთითებს იმ რიტორიკაზე, რომელსაც მმართველი გუნდი სამოქალაქო აქტივისტებისა და კრიტიკული მედიის წინააღმდეგ იყენებს — "ეკლესიის მაგინებლები", "უსამშობლოთა და ურწმუნოთა თაობა", "ექსტრემისტები" და სხვა.

აქვე TDI ხაზს უსვამს იმას, რომ ხელისუფლების რუსულ პროპაგანდას და ეკლესიის სახელით სპეკულირებას არ ემიჯნება საპატრიარქო.

• აღნიშნულია, რომ მიმდინარე მოვლენებზე საპატრიარქოში განცხადება 9 მარტს გაავრცელა, თუმცა არაფერი უთქვამთ რუსულ კანონზე და მხოლოდ ის ადამიანები გააკრიტიკეს, რომლებიც "პოლარიზების გაღვივებას" უწყობენ ხელს.
• "მოცემულ კონტექსტში, ხელისუფლების მიერ საქართველოს მართლმადიდებელი ეკლესიის სახელით მანიპულირება, ხოლო საპატრიარქოს მხრიდან ამ სპეკულაციურ პროპაგანდაზე დუმილი მიზანმიმართულად აქეზებს სამოქალაქო საზოგადოების წარმომადგენლების წინააღმდეგ სიძულვილსა და ძალადობას".
• "ასევე აზიანებს სახელმწიფოსა და ეკლესიას შორის ურთიერთგამიჯვნის პრინციპს, სამოქალაქო ინტეგრაციასა და დემოკრატიულ ფასეულობებს", — ვკითხულობთ განცხადებაში.