რეჟისორ გურამ მაცხონაშვილის სასამართლო, რომელსაც ხულიგნობასა და დაუმორჩილებლობას ედავებიან, მომდევნო დღისთვის გადაიდო.

დეტალები: მაცხონაშვილის თქმით, არასწორი ინფორმაცია უთხრეს დაკავების შემდეგ მის ადგილსამყოფელზე.

• "მთელი ეს დრო მეგონა, რომ ზაჰესში ვყავდი, ასე მითხრეს და თურმე, ყველას ასე უთხრეს ჩემზე. აღმოჩნდა, რომ სულ სხვაგან ვიყავი, დახურული და რემონტზე გასული #2 წინასწარ დაკავების იზოლატორი გახსნეს სპეციალურად ამ ღამისთვის".
• მისი თქმით, სპეცრაზმელები მაშინ დააკავეს, როდესაც მათთან ზურგშექცევით იდგა — ზურგიდან მიეპარნენ და პოლიციელების დიდ ჯგუფში შეათრიეს.
• მაცხონაშვილი ამბობს, რომ სასამართლოზე ვიდეომტკიცებულება სჭირდება, სადაც ჩანს, რომ სპეცრაზმელებს ვერ ხედავს, წინააღმდეგობას არ უწევს და მედიას დახმარებას სთხოვს.
• "დაკავება მოხდა ზუსტად 02:00-ზე, კინო რუსთაველის კუთხეში. თუ რომელიმე მედიას ამ დროით კადრების ამოგდება შეგიძლიათ, მტკიცებულებად წავიღებ. განცალკევებით და წინ ვდგავარ, ამიტომ იოლი საპოვნელი იქნება".

რეჟისორი წერს, რომ დაკავებიდან 15 საათი საჭმელი არ მისცეს. საჭმელი მას შემდეგ მიუტანეს, რაც საკანში სახალხო დამცველი, ლევან იოსელიანი და მისი მოადგილე, გიორგი ბურჯანაძე შევიდნენ.

• მისი თქმით, სამართალდამცავებს უთხრა, რომ ვეგეტარიანელია და ნებისმიერი საჭმელი მიეტანათ, გარდა ხორციანისა, თუმცა რამდენიმე წუთში "ხორციანი მაკარონი" შეაწოდეს, რომელიც უკან გაატანა.
• "ამის შემდეგ 10 საათი არ შემომაწოდეს საჭმელი. მერე ცვლა შეიცვალა და ისინი დამპირდნენ, შემოგიგზავნითო. ისე დავტოვე იზოლატორი 36 საათის თავზე (და მერე 9 საათი სასამართლოს შენობაში), რომ საჭმელი არ მოუციათ".
• გარდა ამისა, არ მისცეს წყალი — "მაქედან დალიეო, მაქედან იყო უნიტაზზე დამონტაჟებული უბინძურესი ხელსაბანი".
• "იმედი მაქვს, მოსამართლე გაიაზრებს, რომ ეს დამსჯელობითი ქცევა იყო და იმასაც, რომ ევროპულ სასამართლო პრაქტიკაში ვეგეტარიანელობა/ვეგანობა რწმენის საკითხად განიხილება და მათი ქცევა დისკრიმინაციულია. იმას რომ თავი გავანებოთ, რომ ამდენი ხანს დაკავებულის შიმშილობა არ შეიძლება".

რატომ არის მნიშვნელოვანი: გუშინ პარლამენტმა დაუგეგმავად განიხილა და პირველი მოსმენით მხარი დაუჭირა რუსულ კანონპროექტს — გასაპროტესტებლად მოქალაქეებმა პარლამენტთან დაიწყეს შეკრება.

• ხელისუფლებამ აქციის მონაწილეთა წინააღმდეგ რამდენიმე სპეციალური საშუალება გამოიყენა, მათ შორის, ცრემლსადენი გაზი, წიწაკის სპრეი, წყლის ჭავლი.
• დილიდან სპეცრაზმმა აქციის დარბევა და მოქალაქეებსა და მედიის წარმომადგენლებზე ძალადობა დაიწყო.
• 7-8 მარტს, პარლამენტთან რუსული კანონის საწინააღმდეგო აქციაზე სამართალდამცველებმა, ჯამში, 133 პირი დააკავეს — დღეს კი შსს-მა განაცხადა, რომ ადმინისტრაციული წესით დაკავებული ყველა პირი გაათავისუფლა.
• NGO-ების შეფასებით, მშვიდობიანი სამოქალაქო პროტესტის წინააღმდეგ პოლიციამ უკანონო და არაპროპორციული ძალა გამოიყენა.