ამის შესახებ დემოკრატიული კვლევის ინსტიტუტი განცხადებას ავრცელებს.

რატომ არის მნიშვნელოვანი: გუშინ, 8 მარტს, ჯაფარიძის ფეისბუქგვერდის ადმინისტრატორი წერდა, რომ პარლამენტის გვერდით შეჰყავდათ რობოკოპები, რა დროსაც ჩხუბი დაიწყო და "თან შეიყოლეს" ჯაფარიძე და პარტიის კიდევ ერთი წევრი, ნიკა მოსიაშვილი.

• ჯაფარიძის ცოლმა, ნატა ქორიძემ თქვა, რომ აქციაზე ჯაფარიძეს თავში მიაყენეს დაზიანებები, შემდეგ კი შესაბამისი სამედიცინო დახმარება არ გაუწიეს.
• მოგვიანებით On.ge-ს შინაგან საქმეთა სამინისტრომ დაუდასტურა, რომ გირჩი — მეტი თავისუფლება-ს ლიდერი დაკავებულია.

დეტალები: ახლად არჩეულმა სახალხო დამცველმა, ლევან იოსელიანმა დაკავებულები მოინახულა და აღნიშნა, რომ ყველაზე დიდი დაზიანება ზურა ჯაფარიძეს ჰქონდა.

• DRI ამბობს, რომ ჯაფარიძე მაშინ დააკავეს, როცა სპეციალური დანიშნულების რაზმის კორდონთან პოლიციელებსა და სპეცრაზმელებს ელაპარაკებოდა.
• "ჯაფარიძე მოულოდნელად წააქცია და სახელმწიფო უსაფრთხოების სამსახურის ბაზის ეზოში შეათრია, სავარაუდოდ, სპეციალური დანიშნულების რაზმის 10-15 კაცისაგან შემდგარმა ჯგუფმა, რომლის წევრებიც არ იყვნენ კანონით დადგენილი წესით იდენტიფიცირებადი", — წერია განცხადებაში.
• ამბობენ, რომ ადმინისტრაციული დაკავების დროს, დაკავებული პირი, პირველივე
  შესაძლებლობისთანავე, არაუგვიანეს 24 საათისა, წარედგინება სასამართლოს.
• უკიდურეს შემთხვევაში, მტკიცებულებების მოპოვების მიზნით, ეს ვადა შესაძლებელია
  ერთჯერადად გახანგრძლივდეს არაუმეტეს 24 საათისა.
• მათი ინფორმაციით, შსს-ს სასამართლოსთვის არ წარუდგენია მტკიცებულება, რომლის მოპოვებაც შესაძლებელი ვერ იქნებოდა დაკავებიდან პირველი 24 საათის განმავლობაში.
• დემოკრატიის კვლევის ინსტიტუტის თქმით, დაკავების ვადის გახანგრძლივება შესაძლებელია ემსახურებოდეს დაკავებულის დასჯას, მისთვის მიყენებული ძლიერი ფიზიკური ტკივილის გახანგრძლივებას და/ან მისი დაზიანებების საზოგადოებისთვის დამალვის მცდელობას.

DRI-ის შეფასებით, ზურა ჯაფარიძის მიმართ იკვეთება ადამიანის უფლებათა ევროპული კონვენციის სულ მცირე, სამი მუხლის დარღვევა.

• მე-3 ადამიანის წამება, არაადამიანური თუ დამამცირებელი დასჯა ან მასთან გათანაბრებული მოპყრობა.
• მე-5 თავისუფლების და უსაფრთხოების უფლება.
• მე-10 მუხლების გამოხატვის თავისუფლება დარღვევა.

DRI მოუწოდებს შინაგან საქმეთა სამინისტროსა და სახელმწიფო უსაფრთხოების სამსახურს, შეწყვიტონ შეკრების მონაწილეების უკანონო დაკავებები.

• დარჩნენ კანონით განსაზღვრულ ფარგლებში, შეასრულონ კანონით დაკისრებული ვალდებულება — უზრუნველყონ შეკრების მონაწილეთა თავისუფლების და უსაფრთხოების დაცვა.

ასევე ორგანიზაცია მოუწოდებს საქალაქო სასამართლოს, დარბაზიდან გაათავისუფლოს ზურა ჯაფარიძე და მიუთითოს მისი დაკავების უკანონობაზე.

ორგანიზაცია საგამოძიებო სამსახურს მიმართავს, რომ ჯაფარიძეს მიმართ განხორციელებული ძალადობით ან იარაღის გამოყენებით ჩადენილი უფლებამოსილების გადამეტების მუხლით დაწყებული გამოძიების ფარგლებში, დაუყოვნებლივ მიენიჭოს დაზარალებულის სტატუსი.