იურიდიულ საკითხთა კომიტეტის სხდომაზე, სადაც ქართული ოცნებიდან ფორმალურად წასული დეპუტატების, ანტიდასავლური ძალის ინიცირებულ რუსულ კანონს განიხილავენ, ხმაური და დაპირისპირებაა. პარალელურად, პარლამენტთან აქცია იმართება.

დეტალები: დღეს სხდომაზე ისევ არ შეუშვეს ჟურნალისტები. გარდა ამისა, საკანონმდებლო ორგანოში დაშვების შეზღუდული რეჟიმი მოქმედებს — ანუ არასამთავრობო სექტორის წარმომადგენლების შესვლა კიდევ უფრო გართულდა.

• სხდომაზე ხმაურის მას შემდეგ დაიწყო, რაც კომიტეტის თავმჯდომარემ დეპუტატებს დღის წესრიგის დამტკიცებისკენ მოუწოდა, ჰკითხა წინააღმდეგი ხომ არ იყო ვინმე, პასუხად კი მიიღო, რომ მთელი საქართველო ამ კანონის წინააღმდეგია.
• ანრი ოხანაშვილმა ოპოზიციონერებს გაფრთხილება მისცა — ლევან ხაბეიშვილს, ანა წითლიძესა და გიორგი ვაშაძეს კი დაემუქრა, რომ მომდევნო გაფრთხილებაზე დარბაზს დაატოვებინებდა.
• მალევე ტექნიკური შესვენება გამოცხადდა და პირდაპირი ეთერი შეწყდა.
• ხათუნა სამნიძემ ვიდეო გაავრცელა, სადაც ჩანდა, რომ ლაივის გათიშვის შემდეგ დარბაზში დეპუტატები ერთმანეთს ფიზიკურად დაუპირისპირდნენ.
• მოგვიანებით, როცა სხდომა განახლდა, ნაციონალური მოძრაობის წევრმა, რომან გოცირიძემ აღნიშნა, რომ დარბაზი ოპოზიციონერი დეპუტატებისგან დაიცალა და ვინც შეკითხვა დასვა, ყველა გააძევეს.

რატომ არის მნიშვნელოვანი: 2 მარტს საგარეო და თავდაცვის კომიტეტებმა რუსულ კანონს მხარი დაუჭირეს, რასაც პარალელურად პარლამენტში და მიმდებარე ტერიტორიაზე ჟურნალისტები და არასამთავრობო სექტორის წარმომადგენლები ვაპროტესტებდით.

• კომიტეტების სხდომაზე არ შეგვიშვეს მედია, NGO-ები, კრიტიკულად განწყობილი დეპუტატები, თუმცა შეუშვეს ანტიდასავლური მოძრაობის, ხალხის ძალის წევრები და ქართულ ოცნებასთან აფილირებული ე.წ. უფლებადამცველები.
• პარლამენტთან აქციაზე მისულ მედიის წარმომადგენლებსა და აქტივისტებს პოლიცია აპატიმრებდა — უმეტესად იმიტომ, რომ მონას და მოღალატეებს იძახდნენ.
• ხოლო მედიაზე, რომელიც პარლამენტში მიმდინარე პროცესებს აშუქებდა იძალადეს — საკანონმდებლო ორგანოს ეზოდან ძალის გამოყენებით გამოაგდეს On.ge-ის მთავარი რედაქტორი, ნეტგაზეთის ჟურნალისტი და ფორმულას ფოტოგრაფი.
• აქციაზე დააკავეს ტაბულას ჟურნალისტი, ბექა ჯიქურაშვილი და პუბლიკას დირექტორი, ზურა ვარდიაშვილი.

საიაში აცხადებენ, რომ სამართალდამცავებმა უნდა იმოქმედონ საქართველოს კონსტიტუციისა და კონვენციური უფლებების პატივისცემით, არ გამოიყენონ არაპროპორციული ძალა.

• ასოციაცია მოუწოდებს სპეციალურ საგამოძიებო სამსახურს — შეისწავლოს მედია წარმომადგენლების, დემონსტრანტების დაკავების, სავარაუდო დაზიანების ფაქტები და ჰქონდეს ჯეროვანი რეაგირება შეკრებისა და გამოხატვის თავისუფლებაში არაპროპორციულ ჩარევაზე, როგორც ფუნდამენტური უფლების შეზღუდვის მსუსხავი ეფექტის მქონე პრაქტიკაზე.

ეთიკის ქარტია პარლამენტის მხრიდან მედიის წარმომადგენლებისთვის საქმიანობაში ხელის შეშლას და ჟურნალისტების დაკავებას გმობს.

• ქარტია მოუწოდებს თავმჯდომარეს ჟურნალისტების ძალის გამოყენებით გაყვანაზე მკაცრი რეაგირება ჰქონდეს და დაავალოს შესაბამის სამსახურებს, შეისწავლონ დაცვის სამსახურის ქმედებები.
• ასევე მოუწოდებს პარლამენტს, უზრუნველყოს მედიის წარმომადგენლების დაუბრკოლებელი მუშაობა საკანონმდებლო ორგანოში, რათა ჟურნალისტებმა მოახერხონ საზოგადოების დროული და სრული ინფორმირება.