ვიდეო, სადაც Birja Mafia-ს კლიპში პოლიციის როლის შემსრულებელი, გიორგი გაგუა ბოდიშის იხდის, წაშლილია. ბოდიშის მოხდის ვიდეო YouTube-ზე იყო განთავსებული.

გაგუა ვიდეორგოლში საუბრობდა, რომ კლიპში მონაწილეობით ყველაზე დიდი შეცდომა დაუშვა. მისი თქმით, მას არ უნდოდა ვიდეოს ნაწილი ყოფილიყო და რეპერებს მისი იუთუბიდან აღება სთხოვა:

"უბრალოდ არ მინდოდა, რომ ამ ყველაფრის ნაწილი ვყოფილიყავი და ამიტომ მივედი, ვთხოვე, რომ ეს კლიპი აეღოთ და ამოეჭრათ იქიდან ჩემი მომენტები, რაზეც უარი მივიღე. საბოლოო ჯამში ამ კადრებს უბრალოდ ბრალი დაადეს თავისივე სურვილით."

Birja Mafia-ს წევრები, გიორგი ქებურიასა და მიშკა მგალობლიშვილს თბილისის საქალაქო სასამართლომ წინასწარი პატიმრობა შეუფარდა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს. ბრალის დამტკიცების შემთხვევაში რეპერებს 8-დან 20 წლამდე ან უვადო თავისუფლების აღკვეთა ემუქრებათ.

გუშინ, 10 ივნისს მათ მხარდასაჭერად აქცია გაიმართა. დაკავებულებს სოლიდარობა გამოუცხადა საქართველოს ყოფილი პრემიერ-მინისტრის ბიძინა ივანიშვილის შვილმა, ბერა ივანიშვილმა. მოგვიანებით კი აქციას საქართველოს ვიცე-პრემიერი, კახა კალაძეც გამოეხმაურა, რომელმაც აღნიშნა, რომ ქვეყანაში ნარკოპოლიტიკა შესაცვლელია.