ტელეკომპანიის ცნობით, კადრები ექსპრეზიდენტის თანხმობით გასაჯაროვდა.

რატომ არის მნიშვნელოვანი: სასამართლომ უარი თქვა სააკაშვილისთვის სასჯელის გადავადებასა და საზღვარგარეთ სამკურნალოდ გადაყვანაზე.

  • ყოფილი პრეზიდენტის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.
  • სააკაშვილის ჯანმრთელობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".

დეტალები: TV პირველის ინფორმაციით, გავრცელებული კადრები კლინიკა ვივამედშია გადაღებული და ასახავს 2022 წლის აგვისტოს, ოქტომბრისა და ნოემბრის პერიოდს.

  • 2022 წლის 11 ოქტომბერი — მიხეილ სააკაშვილი სავარაუდოდ ვერ ახერხებს ტანსაცმლის ჩაცმას და მას ეხმარება ეკა ხერხეულიძე და ვივამედის თანამშრომელი.
  • 2022 წლის 6 ოქტომბერი — კადრებში, რომელიც თავდაპირველად ტელეკომპანია CNN-მა გაავრცელა, ჩანს მიხეილ სააკაშვილის გონების დაკარგვის ეპიზოდი.
  • 2022 წლის 17 ოქტომბერი, 12 ნოემბერი — მიხეილ სააკაშვილი გადაადგილდება დამხმარე მოწყობილობით და უჭირს წონასწორობის დაცვა.
  • 2022 წლის 4 ოქტომბერი — მიხეილ სააკაშვილს მედიცინის მუშაკები ფრჩხილისა და თმის ნიმუშებს უღებენ ტოქსიკოლოგიური ანალიზისთვის.
  • 2022 წლის 8 ოქტომბერი — მიხეილ სააკაშვილს ექიმი ჯეიმს კობი სინჯავს. მოგვიანებით მან განაცხადა, რომ შეიძლება ექსპრეზიდენტმა ვეღარ გაიაროს, თუ ოპერაცია არ ჩაუტარდება.

ფოტო: კადრები TV პირველის გავრცელებული ვიდეოდან.

პროცესი: ვიდეო-ჩანაწერები მოიცავს სააკაშვილის სასამართლო პროცესს, რომელიც მის პალატაში გაიმართა, რადგან მოსამართლემ გასვლითი სხდომის გამართვის გადაწყვეტილება მიიღო. სხდომას ესწრებიან საქმის პროკურორებიც.

  • ვიდეო კადრებში ისმის მხარეების საუბარი.
  • სააკაშვილი აცხადებს რომ ითხოვს ექიმს და პროცესის მიმდინარეობის დაუყოვნებლივ შეწყვეტას და აზუსტებს, რომ აღარ აპირებს საუბრის გაგრძელებას.
  • ექიმი აცხადებს, რომ ექსპრეზიდენტს აქვს 180 წნევა და მისი დაკითხვა ვეღარ გაგრძელდება.

ფოტო: კადრი TV პირველის გავრცელებული ვიდეოდან.