ამის შესახებ ისრაელის პრემიერმინისტრმა, ბენიამინ ნეთანიაჰუმ CNN-თან ინტერვიუში ისაუბრა.

რატომ არის მნიშვნელოვანი: რუსეთის შეჭრის შემდეგ, უკრაინამ ისრაელს სამხედრო მხარდაჭერის თხოვნით არაერთხელ მიმართა.

  • რუსეთის მიერ უკრაინაში ირანული წარმოების დრონების გამოყენებას კი კიევის მხრიდან ისრაელისთვის საჰაერო თავდაცვის სისტემების, რკინის გუმბათის მიწოდების თხოვნა მოჰყვა.
  • უკრაინის პრეზიდენტი ამბობდა, რომ დროა, ისრაელმა აირჩიოს, ვის მხარესაა, პასუხად კი ქვეყნის თავდაცვის მინისტრმა თქვა, რომ ამის გაკეთება არ შეუძლიათ, რადგან უკრაინის დასახმარებლად შეიარაღების საკმარისი მარაგი არ აქვთ.

დეტალები: ნეთანიაჰუს თქმით, უკრაინისთვის სამხედრო დახმარების გაწევას განიხილავს და მათ შორის, საჰაერო თავდაცვის სისტემის, რკინის გუმბათის გადაცემასაც.

  • მისივე განცხადებით, ასევე, მზადაა უკრაინასა და რუსეთს შორის შუამავლის როლი შეასრულოს, თუ ორივე მხარე და აშშ ამაზე შეთანხმდებიან.
  • "თუ ყველა შესაბამისი მხარე მთხოვს, აუცილებლად განვიხილავ", — თქვა მან და დაამატა, რომ მედიაცია "სწორ დროსა და სწორ გარემოებებს" მოითხოვს.

ისრაელის რკინის გუმბათი: ის თანამედროვეობის ერთ-ერთი ყველაზე ძლიერი და ეფექტური ანტისარაკეტო სისტემაა — სიზუსტე 90%-ს შეადგენს, თუმცა ზოგიერთი ექსპერტის თქმით, ეს რიცხვი შეიძლება 80-მდე მერყეობდეს.

  • რკინის გუმბათს ისრაელის ერთ-ერთი ყველაზე წარმატებული კომპანიაა Rafael ქმნის, მათივე დახასიათებით, სისტემა მაღალეფექტური გადამჭერია, რომელიც ყველანაირ ამინდში მუშაობს.
  • ის პირველად 2011 წელს ამუშავდა. ისრაელის შემადგენლობაში დღეს სულ 10 გამშვები ბატარეაა.
  • მიუხედავად იმისა, რომ რკინის გუმბათი ისრაელში იწყობა, ამ პროგრამის განხორციელებაში მთავარი როლი ამერიკის შეერთებულ შტატებს მიუძღვის.

ფოტო: Rafael Advanced Defense Systems