სპეციალურ მიმართვას ხელს სამოქალაქო ორგანიზაციები და სფეროს სპეციალისტები აწერენ.

რატომ არის მნიშვნელოვანი: თბილისის მერია ყოფილი აბრეშუმის ფაბრიკასა და ლაგუნა ვერეს საცურაო აუზის მიმდებარე ტერიტორიაზე მრავალფუნქციური კომპლექსის მშენებლობას განიხილავს.

  • კერძო პირს თბილისის ისტორიული ნაწილის განაშენიანების რეგულირების ზონაში ორი, 48 და 60-სართულიანი ცათამბჯენის მშენებლობა სურს.
  • 25 იანვარს მთავრობის სხდომაზე თბილისის მერმა, კახა კალაძემ განაცხადა, რომ ლაგუნა ვერეს ტერიტორია მუნიციპალიტეტს საკუთრებაში გადაეცა, რისთვისაც ბიძინა ივანიშვილსა და ფონდ ქართუს მადლობა გადაუხადა.
  • მანვე თქვა, რომ პროექტი "ძალიან მაგარი" იქნება და დედაქალაქში მიზიდულობის ახალი ცენტრი გაჩნდება.

დეტალები: არასამთავრობო სექტორის განცხადებით, თბილისის მერმა პროექტის იდეა ისე მოიწონა, რომ წარმოდგენილი და განხილული არ ყოფილა მშენებლობის არქიტექტურული პროექტი და კანონით გათვალისწინებული აუცილებელი კვლევები.

  • "ასევე, წინასაპროექტო კვლევით არ არის წარმოდგენილი ჯეროვანი ინფორმაცია ამ მასშტაბისა და სიმჭიდროვის მშენებლობის ზეგავლენის შესახებ საინჟინრო, საცხოვრებელ, სოციალურ, სარეკრეაციო ინფრასტრუქტურაზე, რაც საჯარო ინტერესის საზიანოდ, გავლენიანი კერძო პირის სასარგებლო გადაწყვეტილების მიღების მორიგი პრეცედენტის განმტკიცების საფრთხეს ქმნის", — ნათქვამია განცხადებაში.

NGO სექტორი მერიას მოუწოდებს, არ გასცენ მშენებლობის ნებართვა, რადგან იგი შეიცავს ქალაქის ისტორიული ნაწილის განადგურებისა და სატრანსპორტო გამტარუნარიანობის კიდევ უფრო გართულების საფრთხეებს.

  • მათივე განცხადებით, მშენებლობა დაუშვებელია რამდენიმე მიზეზის გამო:
  • პროექტის იდეა შეუთავსებელია თბილისის ისტორიულ ნაწილთან, ასევე — ქალაქგეგმარებით სტანდარტებთან, რაც სატრანსპორტო გადატვირთვის საფრთხეებს ქმნის.

ცათამბჯენების წინააღმდეგ პეტიციაც გავრცელდა.

პეტიციის ავტორები, ასევე, მიიჩნევენ, რომ საპროექტო იდეა შეიცავს ქალაქის ისტორიული ნაწილის განადგურებისა და სატრანსპორტო კოლაფსის საფრთხეებს.