თბილისის სახელმწიფო უნივერსიტეტში საარჩევნო პროცესი თვენახევარი მიმდინარეობდა.

რატომ არის მნიშვნელოვანი: რექტორის პოზიცია ვაკანტური მას შემდეგ გახდა, რაც 7 ოქტომბერს გიორგი შარვაშიძემ გადადგომის გადაწყვეტილება მიიღო.

  • ჯაბა სამუშია არჩევნებში ერთადერთი კანდიდატი იყო, რასაც გუშინ მაისის სტუდენტური მოძრაობა აპროტესტებდა და უნივერსიტეტში რექტორის არჩევის წესის ცვლილებას მოითხოვდა.
  • სტუდენტების თქმით, რექტორს ირჩევს საუნივერსიტეტო და სამთავრობო ელიტა და არა აკადემიური სივრცე.
  • ეს პირველი შემთხვევა არაა, როცა სტუდენტებს უნივერსიტეტში მიმდინარე პროცესებზე პროტესტი აქვთ.

სამუშიამ აკადემიურ საბჭოს ნდობისა და მხარდაჭერისთვის მადლობა გადაუხადა და სტუდენტების საპასუხოდ თქვა, რომ საარჩევნო პროცესი 15 ნოემბერს დაიწყო და ნებისმიერ მსურველს შეეძელო, პროცესში მონაწილეობა მიეღო.

  • "სტუდენტებთან გვაქვს ყოველდღიური კომუნიკაცია. არ არსებობს თემა, არ არსებობს საკითხი, რაზეც არ შემიძლია საუბარი, შეთანხმება. არ არსებობს დახურული თემები უნივერსიტეტში. ესაა მიზეზი, რომ დღეს ჩევნ აბსოლუტურად მშვიდ გარემოში ჩავატარეთ არჩევნები", — თქვა მან.
  • ამბობს, რომ მომდევნო ოთხი წლის განმავლობაში, ის ეცდება, იზრუნოს უნივერსიტეტის მომავალზე, რომ სწავლა და მეცნიერული სფერო იყოს ძალიან მაღალ დონეზე.
  • იმ შემთხვევისთვის, თუ მოხდება რექტორის არჩევის წესის ცვლილება, სამუშიას თქმით, რომ როგორც ახლად არჩეული რექტორი, მიიღებს და დაემორჩილება ყველა წესს.

დეტალები: რექტორმა აღნიშნა, რომ სტუდენტური საცხოვრებლის შესახებ მისი არჩევის პირველივე დღიდან თემა დაიძვრება.

  • "ნებისმიერი საკითხი, რომელიც ჩვენი კომპეტენციის საკითხი იქნება, გადავწყვეტთ ისე, როგორც უნივერსიტეტისთვის იქნება სასარგებლო", — განაცხადა ჯაბა სამუშიამ.
  • სამუშია ასევე თსუ-ის რექტორის მოვალეობის შემსრულებლის ერთადერთი კანდიდატიც იყო.

არქივიდან: თსუ-ს ყოფილმა რექტორმა, გიორგი შარვაშიძემ თანამდებობიდან გადადგომის მოთხოვნით აკადემიურ საბჭოს 7 ოქტომბერს მიმართა.

  • შარვაშიძე ივანე ჯავახიშვილის სახელობის თბილისის სახელმწიფო უნივერსიტეტის რექტორის თანამდებობაზე 2016-2020 წლებში პირველი ვადით, 2020 წლიდან კი მეორე ვადით იყო არჩეული.