პარლამენტმა კანონპროექტს მხარი 75 ხმით დაუჭირა.

რატომ არის მნიშვნელოვანი: წამლების რეფერენტული ზღვარი ითვალისწინებს მედიკამენტების ფასზე იმ ზედა ზღვრული მაჩვენებლის დაწესებას, რის ზემოთაც ბაზარზე მედიკამენტის რეალიზაცია დაშვებული იქნება.

  • 2022 წლის 10 იანვარს ირაკლი ღარიბაშვილმა განაცხადა, რომ გადადგამდნენ ნაბიჯებს, რაც მედიკამენტების ფასებს შეამცირებდა, 17 იანვარს კი თურქეთის ბაზარი გაიხსნა.

დეტალები: ჯანდაცვის მინისტრის მოადგილემ, თამარ გაბუნიამ პარლამენტში განაცხადა, რომ კანონში ცვლილება ეხება ქვეყანაში მედიკამენტებზე ხელმისაწვდომობის გაუმჯობესებას.

  • "ყველა ქვეყნის გამოცდილება არის ის, რომ რეფერენტული ფასის დანერგვა გარკვეული მედიკამენტების ჯგუფზე ამცირებს მედიკამენტების ხარჯებს, მას მეტად ხელმისაწვდომს ხდის მოსახლეობისთვის, ზრდის მოსახლეობის კმაყოფილებას და აუმჯობესებს ჯანდაცვის გამოსავლებს", — განაცხადა გაბუნიამ.
  • მინისტრის მოადგილეს განცხადებით, მეთოდი საქართველოს პირობებში რეკომენდებულია მსოფლიო ბანკისა და ჯანდაცვის მსოფლიო ორგანიზაციის ექსპერტების მიერ.
  • გაბუნიას თქმით, რეფერენტული ფასები პირველ ეტაპზე დაახლოებით 1000-1200 მედიკამენტს შეეხება და მედიკამენტების ფასებზე სავარაუდოდ 40%-იან კლებას მოგვცემს.
  • სამინისტრო ამ მექანიზმის სხვა მედიკამენტებზეც ეტაპობრივად, გონივრულ ვადებში გავრცელებას გეგმავს.