7 ნოემბერს მედიებმა და NGO-ებმა ევროპული საბჭოს პრეზიდენტის, შარლ მიშელს მიმართეს, პრეზიდენტ სალომე ზურაბიშვილს გვარამიას შეწყალებისკენ მოუწოდოს.

რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებელი, ნიკა გვარამია დღეს, 2 ნოემბერს სააპელაციო სასამართლომ 3 წლითა და 6 თვით პატიმრობაში დატოვა.

  • NGO-ების განცხადებით, გვარამიას საქმე პოლიტიკურად მოტივირებულია. ომბუდსმენი კი უკიდურეს შეშფოთებას გამოხატავს.
  • აშშ-ის საელჩომ სააპელაციოს გადაწყვეტილება შეაფასა და თქვა, რომ გვარამიას პატიმრობა რისკის ქვეშ აყენებს ქართველი ხალხის მკაფიო არჩევანს.

დეტალები: შარლ მიშელი პასუხში წერს, რომ ყურადღებით ადევნებენ თვალს გვარამიას სასამართლო პროცესს, მათ შორის თბილისში, ევროკავშირის წარმომადგენლების მეშვეობით.

  • "ევროკავშირში არ კეთდება კომენტარები ცალკეული სასამართლო საქმეების არსებით ნაწილზე, თუმცა აღვნიშნავთ, რომ დაისვა კითხვები, მათ შორის სახალხო დამცველის მხრიდან, სასამართლოს მსჯელობის შესახებ ბატონი გვარამიას საქმეში, როგორც განაჩენის გამოტანის, ასევე სასჯელის კუთხით";
  • კაბინეტი აღნიშნავს, რომ ფუნდამენტური უფლებები და სათანადო სამართლებრივი პროცესი უნდა იყოს დაცული გამჭვირვალე და სამართლიანი სასამართლო გადაწყვეტილებებით;
  • "ევროკავშირმა არაერთხელ მოუწოდა საქართველოს ხელისუფლებას, ჩაერთონ სასამართლო სისტემის ინკლუზიურ და ყოვლისმომცველ რეფორმაში. ეს არის ასევე 2021 წლის 19 აპრილის პოლიტიკური შეთანხმებისა და რამდენიმე ხნის წინ მიღებული ევროკავშირი-საქართველოს ასოცირების დღის წესრიგის ერთ-ერთი ქვაკუთხედი", — წერს შარლ მიშელის კაბინეტი.

გარდა ამისა, მიშელის კაბინეტი აცხადებს, რომ ერთ-ერთი პრიორიტეტი, რომელიც ხაზგასმულია კომისიის მოსაზრებაში საქართველოს ევროკავშირში გაწევრიანებაზე განაცხადის შესახებ, არის ის, რომ საქართველომ უნდა გაწიოს უფრო ძლიერი ძალისხმევა თავისუფალი, პროფესიული, პლურალისტური და დამოუკიდებელი მედიაგარემოს უზრუნველსაყოფად.

  • "განსაკუთრებით იმის უზრუნველსაყოფად, რომ მედიის მფლობელების წინააღმდეგ სისხლისსამართლებრივი დევნა შეესაბამებოდეს უმაღლეს სამართლებრივი სტანდარტებს";
  • მიშელი აცხადებს, რომ ევროკავშირი კვლავაც ყურადღებით დააკვირდება მოვლენებს და მართლმსაჯულების უფრო ფართო რეფორმას.

წერილს, რომელიც შარლ მიშელთან გაიგზავნა ხელს აწერს საქართველოს ჟურნალისტური ეთიკის ქარტია, ღია საზოგადოების ფონდი, საერთაშორისო გამჭვირვალობა — საქართველო, სამართლიანი არჩევნების და დემოკრატიის საერთაშორისო საზოგადოება და სხვა.

  • განცხადებას უერთდება On.ge, ასევე მთავარი არხი, ფორმულა, TV პირველი, ნეტგაზეთი, პუბლიკა და სხვები.
  • ხელმომწერთა სრული სია შეგიძლიათ იხილოთ აქ.