11 არასამთავრობო ორგანიზაცია შეშფოთებას გამოთქვამს აზერბაიჯანელი ჟურნალისტის, აფგან მუხთარლის სავარაუდო იძულებითი გაუჩინარების გამო და მთავრობის, პროკურატურისა და პარლამენტის მიმართ მოწოდებებს ავრცელებენ. ადამიანის უფლებების სწავლებისა და მონიტორინგის ცენტრი, საქართველოს დემოკრატიული ინიციატივა, თბილისის ადამიანის უფლებათა სახლი, ადამიანია უფლებათა სახლების ფონდი, საერთაშორისო გამჭირვალობა - საქართველო, საქართველოს ახალგაზრდა იურისტთა ასოციაცია, საქართველოს გაეროს ასოციაცია, სამართლიანი არჩევნებისა და დემოკრატიის საერთაშორისო საზოგადოება, ტოლერანტობისა და მრავალფეროვნების ინსტიტუტი, მედიის განვითარების ფონდი და ღია საზოგადოება - საქართველო ამის შესახებ ერთობლივი განცხადება გაავრცელეს.

"ბოლო პერიოდში ფიქსირდება პრაქტიკა, როდესაც აზერბაიჯანის მოქალაქეებს, რომლებიც კრიტიკულად არიან განწყობილები აზერბაიჯანში შექმნილი არადემოკრატიული პოლიტიკური რეჟიმის მიმართ და ჟურნალისტურ, აქტივისტურ ან პოლიტიკურ საქმიანობას აგრძელებენ საქართვეოლოში, საქართველოს სახელმწიფო უარს აცხადებს ბინადრობის მოწმობების ან ლტოლვილის სტატუსის მინიჭებაზე. აღნიშნული პრაქტიკა აჩენს ეჭვებს აზერბაიჯანის ხელისუფლების მიმართ საქართველოს მთავრობის პოლიტიკურ ლოიალობაზე, რომელიც არსებით წინააღმდეგობაში მოდის დემოკრატიის ფუნდამენტურ პრინციპებთან და ადამიანის უფლებების დაცვის იდეასთან," - აცხადებენ არასამთავრობო ორგანიზაციები.

On.ge გთავაზობთ მიმართვის ტექსტებს:

საქართველოს მთავრობას

• გაასაჯაროოს ყველა იმ კითხვაზე პასუხი, რაც საზოგადოებაში არსებობს;
• უზრუნველყოს საქართველოში მყოფი მეზობელი ქვეყნებიდან დევნილი აქტივისტების, ჟურნალისტების პოლიტიკოსების და სხვა პირების საქართველოში ლეგალური ცხოვრების, თავისუფალი გადაადგილებისა და ხელშეუხებლობის თავისუფლება.

საქართველოს პროკურატურას

• საქმეზე დროული გამოძიება ჩაატაროს;
• საზოგადოების დროული ინფორმირება გამოძიების შესახებ.

საქართველოს პარლამენტს

• საპარლამენტო კონტროლის განხორციელება.

აზერბაიჯანელი ჟურნალისტი აფგან მუხთარლი თბილისში დაიკარგა. ის გუშინ სახლიდან გავიდა და არ დაბრუნებულა. მისმა მეუღლემ, ლეილა მუსტაფაევამ პოლიციას მიმართა. აფგანი ერთ წელზე მეტია თბილისში ცხოვრობს. მას თავის საქმიანობიდან გამომდინარე აზერბაიჯანის ხელისუფლებასთან პრობლემები ჰქონდა.

საქართველოს შინაგან საქმეთა სამინისტრო საქმეს სისხლის სამართლის კოდექსის 143-ე მუხლი მიხედვით იძიებს, რაც თავისუფლების უკანონო აღკვეთას გულისხმობს.

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია. საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.