ინფორმაციას საქართველოს პროკურატურა ავრცელებს.

რატომ არის მნიშვნელოვანი: მათი ცნობით, ბრალდებული ჯგუფურად, ცოლთან და კიდევ ერთ პირთან ერთად, სასურველი ავეჯის დამზადების პირობით, 26 მოქალაქის კუთვნილ 473 252 ლარს მოტყუებით დაეუფლა.

• სასამართლომ კომპანია მელაძის მფლობელს აღკვეთის ღონისძიების სახით გირაო 7 000 ლარი შეუფარდა — პროკურატურის განცხადებით, მას ჩამოერთვა პასპორტი და აეკრძალა ქვეყნიდან გასვლა.
• თუმცა, როგორც უწყება ამბობს, ბრალდებული გამოძიებას მიემალა, ამიტომ მოითხოვეს აღკვეთის ღონისძიების პატიმრობით შეცვლა.
• სასამართლომ მოთხოვნა დააკმაყოფილა და მასზე ძებნა გამოცხადდა.
• ვაჟა მელაძე ბრალს არ აღიარებს.

დეტალები: მას ბრალდება 2022 წლის 25 ივნისს 2 მუხლით წარედგინა, რაც გულისხმობს დიდი ოდენობით თაღლითობას, რამაც მნიშვნელოვანი ზიანი გამოიწვია.

• უწყებაში ამბობენ, რომ ამის შემდეგ გამოძიებას ათეულობით დაზარალებულმა ანალოგიური თაღლითობის ფაქტებზე, ამიტომ ბრალი დაზუსტდა.
• კერძოდ, ბრალი წარედგინა: წინასწარი შეთანხმებით ჯგუფის ჩადენილი თაღლითობის 20 ეპიზოდზე და თაღლითობის 6 ეპიზოდზე, რამაც მნიშვნელოვანი ზიანი გამოიწვია.
• იმ შემთხვევაში, თუ დადასტურდება, რომ მელაძეს უკანონოდ აქვს გადაკვეთილი საქართველოს საზღვარი, დამატებით წარედგინება ბრალდება შესაბამისი მუხლით.

გარდა ამისა, 2022 წლის 31 ოქტომბერს ბრალი წარედგინა ორ პირს. მათ შორის, მელაძის ცოლს იმავე მუხლებით.

• კერძოდ: თაღლითობა ჩადენილი წინასწარი შეთანხმებით ჯგუფის მიერ — 17 ეპიზოდი, თაღლითობა ჩადენილი წინასწარი შეთანხმებით ჯგუფის მიერ, რამაც მნიშვნელოვანი ზიანი გამოიწვია — 3 ეპიზოდი.
• უწყების მტკიცებით, დასტურდება, რომ ის უშუალოდ იყო ჩართული თაღლითურ სქემაში, იყო კომპანიის დამფუძნებელი, პირადად მონაწილეობდა საწარმოს მართვაში და მისი მითითებით ხდებოდა დაზარალებულების თანხების განკარგვა.
• "ვინაიდან, აღნიშნული პირიც თავს არიდებდა საგამოძიებო ორგანოში გამოცხადებას, მას გადაკვეთილი აქვს საქართველოს საზღვარი და იმყოფება მიმალვაში, პროკურატურის შუამდგომლობის საფუძველზე, თბილისის საქალაქო სასამართლომ მას აღკვეთის ღონისძიების სახით პატიმრობა შეუფარდა", — აცხადებს უწყება.
• ხოლო მეორე პირს, რომელსაც ბრალი იმავე მუხლებით აქვს წარდგენილი, მაგრამ ნაკლებ ეპიზოდებზე, აღკვეთის ღონისძიების სახით 15 000-ლარიანი გირაო შეეფარდა.
• პროკურატურის განცხადებით, ამ დროისათვის საქმეში ფიგურირებს 47 დაზარალებული და მათ მიმართ მიყენებული ზიანი ჯამში შეადგენს 719 408 ლარს.

ვაჟა მელაძე ბრალის წარდგენის შემდეგ ფეისბუქგვერდზე და პეტიციაში წერდა, რომ მის ოჯახზე ხორციელდება დევნა და ითხოვდა, პასუხისგებაში მიეცეს ყველა დირექტორი, ვინც მიითვისა თანხები მომხმარებლებისგან და შემდეგ მას დააბრალა.

• მისი თქმით, კომპანიაში კიბერთავდასხმა მოხდა, თანხა დაიკარგა და პროკურატურას რეაგირება არ ჰქონია.
• ამბობდა იმასაც, რომ "სახელმწიფოს მარიონეტები" უკანონოდ თხოვდნენ კომპანიის წილს.
• "უამრავი მტკიცებულება გვაქვს, თუ როგორ გაანადგურა პროკურატურამ დაცვის მასალები. ასევე, როგორ აიძულეს ვაჟა მელაძეს დაეტოვებინა ქვეყანა ახლა კი ქვეყანაში თუ ჩავა ელოდება სასჯელი რომელიც ჩინოვნიკების მიერ არის გაფორმებული", — წერდა ის.
• ამასთანავე მელაძემ ფეისბუქგვერდზე გამოაქვეყნა ვიდეო, რომელშიც საუბრობდა, რომ პროკურატურა პირად მონაცემებს იყენებდა და ამის დასამტკიცებლად ფაილები ატვირთა — უწყების განცხადებით, სხვათა პერსონალური მონაცემების გავრცელებასთან დაკავშირებით, სპეციალურ საგამოძიებო სამსახურში გამოძიება დაიწყო.