ამის შესახებ ისაუბრეს ნიუ ჰოსპიტალსის ექიმმა, დავით ციბაძემ, ჯანდაცვის მინისტრმა, ზურაბ აზარაშვილმა და ერთიანი ნაციონალური მოძრაობის წევრმა, სოფო ჯაფარიძემ, რომლებმაც დაშავებული არასრულწლოვანი კლინიკაში მოინახულეს.

ექიმის თქმით, ბავშვი უკვე კონტაქტურია და მშობლებთან კომუნიკაციაც შეძლო.

• "რასაკვირველია, გარკვეული რისკები რჩება, თუმცა პირველი 24სთ, ყველაზე ცუდი რაც შეიძლებოდა მომხდარიყო, მეტ-ნაკლებად დაძლეულია და ვიმედოვნებ, რომ ძალიან მალე სახლში წავა ლაზარე", — ამბობს ექიმი.
• მისივე თქმით, გრძელდება პაციენტზე მეთვალყურეობა.

ჯანდაცვის მინისტრი ამბობს, რომ ბავშვის მდგომარეობა მნიშვნელოვნად გაუმჯობესდა.

• "დიდხანს ვისაუბრეთ ექიმთან, რეანიმატოლოგთან, ასევე ოჯახის წევრებსაც ვესაუბრე და ვფიქრობ, ძალიან მალე ის დატოვებს კლინიკას. ჩვენი მხრიდან რაც არის საჭირო, იქნება ეს რეაბილიტაციის თუ მკურნალობის პროცესში, ყველაფრისთვის მზად ვართ და ყველაფერს გავაკეთებთ", — განაცხადა აზარაშვილმა.
• მინისტრის თქმით, ამ ეტაპზე ბავშვის საზღვარგარეთ გადაყვანის საჭიროება არ არსებობს და მას ყველა საჭირო მკურნალობა ადგილზე უტარდება.
• მისი ინფორმაციით, კლინიკას უახლოეს პერიოდში დატოვებს კიდევ ერთი დაშავებული, რომელიც იაშვილის კლინიკაში მკურნალობს.

სოფო ჯაფარიძის თქმით, პაციენტს ამ ეტაპზე არ აქვს სიცხე, დინამიკა არის დადებითი და წამოვიდა რეფლექსები.

• "ძალიან ბედნიერი გამოვედი განყოფილებიდან. 24სთ-იანმა ყველაზე კრიტიკულმა პერიოდმა გადაიარა ყოველგვარი გართულების გარეშე", - თქვა მან.

რა მოხდა: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. კლინიკაში გადაყვანის შემდეგ 13 წლის მოზარდი გარდაიცვალა, ხოლო 2 დაშავებული კლინიკაში გადაიყვანეს.

• გამოძიება სისხლის სამართლის კოდექსის 240-ე პრიმა მუხლის პირველი და მეორე ნაწილით გრძელდება, რაც ელექტრო ობიექტზე უსაფრთხოების წესების დარღვევას გულისხმობს, რასაც ადამიანის სიცოცხლის მოსპობა მოჰყვა.

ვაკის პარკში კასკადისა და მრგვალი შადრევნის რეაბილიტაცია 12 ოქტომბერს დასრულდა. სარეაბილიტაციო სამუშაოებს კომპანია გრინსერვისი+ ასრულებდა. მისი მფლობელის, ლაშა ფურცხვანიძის წინააღმდეგ 2013 წელს სამეწარმეო საქმიანობაში უკანონო მონაწილეობის და უკანონო შემოსავლის ლეგალიზაციის საქმეზე გამოძიება მიმდინარეობდა.

• 2018 წელს TI აღნიშნავდა, რომ მიუხედავად ამისა, ეს კომპანია 2013 წლის იანვრიდან მონაწილეობს სახელმწიფო შესყიდვებში და 2018 წლის პირველ ნოემბრამდე 21 მლნ ლარის ღირებულების ელექტრონული ტენდერები მოიგო, ასევე, გამარტივებული შესყიდვით 95 000 ლარი მიიღო.
• 2021 წელს ფლანგვის დეტექტორი წერდა, რომ მხოლოდ 2020 წელს კომპანიამ 5 ტენდერში უკონკურენტოდ გაიმარჯვა და 7 წელში ტენდერების გზით დაახლოებით 41 256 287 ლარი აქვს მიღებული.
• შესყიდვების გვერდზე ოფიციალურად წარდგენილ დოკუმენტაციაში ვაკის პარკში რეაბილიტაციაზე ბოლო მიღება-ჩაბარების აქტი 26 აგვისტოთი თარიღდება — წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო აკრედიტებული ინსპექტირების ორგანოს, მშენექსპერტის ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები.
• ინსპექტირების ანგარიშის დოკუმენტში კი აღნიშნულია, რომ სამუშაოები შესრულებულია საპროექტო-სახარჯთაღრიცხვო დოკუმენტაციის შესაბამისად და შესაბამისობაშია საქართველოში მოქმედ სამშენებლო ნორმებთან და წესებთან.