პროკურატურა კორცხელის ინციდენტზე ბრალდებულებისათვის გირაოს შეფარდებას ითხოვს, თუმცა, ვინაიდან მას ჯერ სასამართლოსთვის არ მიუმართავს, უცნობია, როდის გაიმართება აღნიშნული პირები სასამართლო პროცესი.

თავის მხრივ, ნაციონალური მოძრაობა ბრალდებულებისათვის პროკურატურის მიერ წარდგენილ ბრალდებას არაადეკვატურს უწოდებს და ამბობს, რომ საქმე უნდა გადაკვალიფიცირდეს. მათი თქმით, პირველ რიგში, ინციდენტის ორგანიზატორი უნდა დაისაჯოს.

ერთიანი ნაციონალური მოძრაობის წევრი, თენგიზ გუნავა აცხადებს, რომ ენმ-ს ინფორმაციით, ინციდენტის უშუალო დამკვეთი ვიცეპრემიერი, კახა კალაძეა. მისი განმარტებით, სწორედ კალაძე იყო წამქეზებელი და მას ეკისრება მომხდარზე უშუალო პასუხისმგებლობა.

უმრავლესობის წევრი, ეკა ბესელია კი ამბობს, რომ იმ პერიოდში, როდესაც მოქალაქეებზე უამრავი თავდასხმა ხორციელდებოდა, არავის პასუხისმგებლობის საკითხი არ დგებოდა ხოლმე, აღნიშნული კი უპრეცედენტო შემთხვევაა:

"თუმცა, ძალიან მნიშვნელოვანი იქნება აქ, კანონის და სამართლის სიზუსტით მოხდეს გადაწყვეტილებების მიღება და სასამართლომ და გამოძიებამ მხოლოდ სამართლიანობისა და კანონიერების პრინციპით იხელმძღვანელოს".

რაც შეეხება რესპუბლიკელების პოზიციას, თამარ კორძაია ამბობს, რომ იმ პირობებში, როდესაც დღევანდელი ხელისუფლება და სამოქალაქო საზოგადოება ამბობს, რომ მაქსიმალურად ჰუმანური უნდა იყოს დევნის ორგანიზების საქმიანობა, არის ჩვეულებრივი და მისაღები:

"მაგრამ ასეთივე ჰუმანური უნდა იყო საგამოძიებო ორგანოები და პროკურატურა ყველა სამართალდარღვევის მიმართ და შეკითხვები აი ასეთ შემთხვევაში უნდა გაგვიჩნდეს იმიტომ, რომ პარლამენტთან მომხდარი აქციის დროს გირაოს კი არა, პატიმრობას ითხოვდნენ ამიტომ, თანასწორი მიდგომა, ჰუმანური მიდგომის თვალსაზრისით უნდა გამოიყენოს პროკურატურამ ყოველთვის".

კორცხელის ინციდენტში მონაწილე 6 პირს ბრალი 1 ივნისს წარედგინა. შსს-ს ცნობით, ინციდენტში მონაწილე 5 პირს ბრალი სისხლის სამართლის კოდექსის 239-ე მუხლის მეორე ნაწილის "ა" ქვეპუნქტით წარედგინათ, რაც წინასწარი შეთანხმებით, ჯგუფის მიერ ჩადენილ ხულიგნობას გულისხმობს.

ერთ პირს კი ბრალი სისხლის სამართლის კოდექსის 239-ე მუხლის მეორე და მესამე ნაწილებით წარედგინა, რაც ხულიგნობას, ასევე წინასწარი შეთანხმებით ჯგუფის მიერ, ხელისუფლების წარმომადგენლის ან ხულიგნობის აღმკვეთი სხვა პირის მიმართ ჩადენილი ცეცხლსასროლი იარაღის ან იარაღად სხვა საგნის გამოყენებას გულისხმობს.