სომხეთის უსაფრთხოების საბჭოს მდივნის, არმენ გრიგორიანის განცხადებით, შეთანხმებას საერთაშორისო თანამეგობრობის წყალობით მიაღწიეს.

რატომ არის მნიშვნელოვანი: 12 სექტემბერს დილით გავრცელდა ინფორმაცია, რომ აზერბაიჯანულმა მხარემ ცეცხლი გაუხსნა მთიან ყარაბაღის ორ დასახლებას — კარმირ შუკასა და თაღავარდს.

  • აზერბაიჯანის თავდაცვის სამინისტრო კი ამტკიცებდა, რომ სომხეთის შეიარაღებული ძალები რამდენიმე დღეა აზერბაიჯანის პოზიციების მიმართულებით ისვრიან, რასაც სომხეთის უარყოფდა;
  • საღამოს კი ცნობილი გახდა, რომ აზერბაიჯანი სომხეთის 3 ქალაქს ინტენსიურად ბომბავდა.
  • 13 სექტემბერს სხვადასხვა წყარო ავრცელებდა ინფორმაციას, რომ აზერბაიჯანი და სომხეთი ცეცხლის შეწყვეტაზე შეთანხმდნენ. მოგვიანებით, ეს რუსეთმა ოფიციალურად დაადასტურა, თუმცა სროლა არ შეწყვეტილა.

დეტალები: ოფიციალური ერევანი გამოთქვამს იმედს, რომ აზერბაიჯანი დაიცავს ამ შეთანხმებას.

  • აზერბაიჯანს ცეცხლის შეწყვეტის შესახებ ოფიციალური განცხადება ამ დროისთვის არ გაუვრცელებია.
  • სომხეთის თქმით, 105 სამხედრო დაიღუპა, აზერბაიჯანმა კი 54 სამხედრო მოსამსახურის დაღუპვის შესახებ განაცხადა.

პროტესტი სომხეთში: გუშინ, 14 სექტემბერს სომხეთში მოქალაქეები მთავრობის გადადგომას ითხოვდნენ.

  • მედიებში გავრცელდა ინფორმაცია, რომ ფაშინიანი მზად იყო აზერბაიჯანთან "შეთანხმებამდე" მისულიყო და ისეთი დოკუმენტისთვის მოეწერა ხელი, რომელიც მთიან ყარაბაღს აზერბაიჯანის ნაწილად აღიარებდა.
  • მოგვიანებით მან ეს ინფორმაცია Facebook-გვერდზე უარყო და თქვა, რომ არავითარი დოკუმენტისთვის ხელი არ მოუწერია და არც აპირებს;
  • მისი თქმით, როდესაც შეთანხმებისთვის მზადყოფნა გამოთქვა, იგულისხმა, რომ ის მზადაა "საყოველთაო გადაწყვეტისთვის".